മുംബൈ: വൻ സ്വർണക്കടത്ത് ശൃംഖലയെ തകർത്തതായി Directorate of Revenue Intelligence (ഡിആർഐ) അറിയിച്ചു. മുംബൈയിലെ Chhatrapati Shivaji Maharaj International Airport ൽ നടത്തിയ പരിശോധനയിൽ 29.37 കിലോഗ്രാം സ്വർണം പിടിച്ചെടുത്തു. ഏകദേശം 37.74 കോടി രൂപ വിലവരുന്ന സ്വർണമാണ് ഇത്.
രഹസ്യവിവരത്തെ അടിസ്ഥാനമാക്കി നടത്തിയ നിരീക്ഷണത്തിനൊടുവിലാണ് സ്വർണക്കടത്ത് സംഘം പിടിയിലായത്. വിദേശത്തുനിന്ന് എത്തിയ യാത്രക്കാരിൽ ഉൾപ്പെട്ട 24 വനിതകളെയാണ് കറിയർമാരായി ഉപയോഗിച്ചതായി കണ്ടെത്തിയത്. ഇവരെ അറസ്റ്റ് ചെയ്തതായി ഡിആർഐ അറിയിച്ചു.
പരിശോധനയിൽ 25.10 കിലോ സ്വർണബാറുകളും 4.27 കിലോ സ്വർണാഭരണങ്ങളും യാത്രക്കാരുടെ ബാഗുകളിലും വസ്ത്രങ്ങളിലുമായി ഒളിപ്പിച്ച നിലയിൽ കണ്ടെത്തി. സുരക്ഷാ പരിശോധനകൾ മറികടക്കാൻ പ്രത്യേകമായി പരിശീലനം നൽകിയ സംഘമാണിതെന്ന് അന്വേഷണത്തിൽ വ്യക്തമായി.
സംഭവത്തിൽ അന്താരാഷ്ട്ര സ്വർണക്കടത്ത് ശൃംഖലയുമായി ബന്ധമുണ്ടെന്ന സംശയത്തിൽ അന്വേഷണം വ്യാപിപ്പിച്ചു. രാജ്യത്തിന്റെ സാമ്പത്തിക സുരക്ഷയെ ബാധിക്കുന്ന ഇത്തരം കുറ്റകൃത്യങ്ങൾക്കെതിരെ ശക്തമായ നടപടികൾ തുടരുമെന്ന് ഡിആർഐ അറിയിച്ചു.
