മുംബൈ: കുരാർ മേഖലയിൽ വ്യാജ പാസ്പോർട്ട് നിർമാണവും ഹവാല ഇടപാടുകളും നടത്തിയിരുന്ന ശൃംഖലയെ പൊലീസ് പൊളിച്ചടുക്കി. കേസിലെ മുഖ്യപ്രതിയെ അറസ്റ്റ് ചെയ്തതായി പൊലീസ് അറിയിച്ചു. രഹസ്യമായി പ്രവർത്തിച്ചിരുന്ന ക്രമബദ്ധമായ സംഘമാണിതെന്ന് അന്വേഷണത്തിൽ വ്യക്തമായി.
പ്രതിയുടെ ഭാര്യ നൽകിയ പരാതിയാണ് കേസിന് വഴിത്തിരിവായത്. ഭർത്താവിന്റെ അനധികൃത ഇടപാടുകളും വ്യാജ രേഖകൾ തയ്യാറാക്കി വിദേശയാത്രകൾക്ക് സഹായം നൽകിയതുമായ വിവരങ്ങൾ പരാതിയിൽ ഉൾപ്പെട്ടിരുന്നു. ഇതിന്റെ അടിസ്ഥാനത്തിലാണ് പൊലീസ് അന്വേഷണം ആരംഭിച്ചത്.
തുടർന്നുള്ള പരിശോധനയിൽ വ്യാജ പാസ്പോർട്ടുകൾ നിർമ്മിച്ച് ആളുകൾക്ക് അനധികൃതമായി വിദേശയാത്രകൾക്ക് സൗകര്യം ഒരുക്കിയതും ഹവാല വഴിയുള്ള പണമിടപാടുകളും നടത്തിയതും കണ്ടെത്തി. ഈ ശൃംഖലയുമായി ബന്ധപ്പെട്ട കൂടുതൽ ആളുകളെ കുറിച്ച് അന്വേഷണം തുടരുകയാണ്.
രാജ്യസുരക്ഷയെ ബാധിക്കുന്ന ഇത്തരം കുറ്റകൃത്യങ്ങൾക്കെതിരെ കർശന നടപടി തുടരുമെന്ന് പൊലീസ് അറിയിച്ചു.
