മുംബൈ: ബുക്ക് ചെയ്ത സ്പെയിൻ ടൂർ പാക്കേജ് റദ്ദാക്കിയിട്ടും തുക തിരികെ നൽകാതെ ഉപഭോക്താവിനെ വട്ടംചുറ്റിച്ച പ്രമുഖ ഓൺലൈൻ ട്രാവൽ കമ്പനിയായ ‘മേക്ക് മൈ ട്രിപ്പിന്’ (MakeMyTrip) മുംബൈ ഉപഭോക്തൃ കോടതിയുടെ കനത്ത പ്രഹരം. പരാതിക്കാരിയായ യുവതിക്ക് 86,000 രൂപ അടിയന്തരമായി തിരികെ നൽകാൻ സൗത്ത് മുംബൈ ഡിസ്ട്രിക്ട് കൺസ്യൂമർ ഡിസ്പ്യൂട്ട്സ് റെഡ്രെസൽ കമ്മീഷൻ ഉത്തരവിട്ടു. സേവനത്തിൽ ഗുരുതരമായ വീഴ്ച വരുത്തിയതിനാണ് കമ്പനിക്കെതിരെ കോടതി കർശന നടപടി സ്വീകരിച്ചത്.
മുംബൈ സ്വദേശിയായ യുവതി തന്റെ സ്പെയിൻ യാത്രയ്ക്കായി മേക്ക് മൈ ട്രിപ്പ് വഴി വൻ തുക നൽകി പാക്കേജ് ബുക്ക് ചെയ്തിരുന്നു. എന്നാൽ വിസ അപേക്ഷ നിരസിക്കപ്പെട്ടതിനെ തുടർന്ന് ഇവർക്ക് യാത്ര ചെയ്യാൻ സാധിച്ചില്ല. വിസ കിട്ടാത്ത സാഹചര്യത്തിൽ മുൻകൂട്ടി ബുക്ക് ചെയ്ത ടൂർ പാക്കേജ് റദ്ദാക്കാനും തുക റീഫണ്ട് ചെയ്യാനും യുവതി കമ്പനിയോട് ആവശ്യപ്പെട്ടു. എന്നാൽ ന്യായമായ കാരണങ്ങളില്ലാതെ പണം തിരികെ നൽകാൻ മേക്ക് മൈ ട്രിപ്പ് തയ്യാറാകാതിരുന്നതോടെയാണ് യുവതി കോടതിയെ സമീപിച്ചത്.
ബുക്കിങ് സമയത്ത് റീഫണ്ട് പോളിസികളെക്കുറിച്ച് വ്യക്തമായ വിവരങ്ങൾ നൽകാതിരുന്ന കമ്പനി, തുക തിരികെ ചോദിച്ചപ്പോൾ നിഷേധാത്മക നിലപാടാണ് സ്വീകരിച്ചതെന്ന് ഉപഭോക്തൃ കോടതി നിരീക്ഷിച്ചു. വിസ നിരസിക്കപ്പെടുന്നത് യാത്രക്കാരുടെ നിയന്ത്രണത്തിലമുള്ള കാര്യമല്ലെന്നും അത്തരം സാഹചര്യങ്ങളിൽ തുക പൂർണ്ണമായി തടഞ്ഞുവെക്കുന്നത് അനുചിതമാണെന്നും കോടതി ചൂണ്ടിക്കാട്ടി. കമ്പനിയുടെ ഭാഗത്തുനിന്നുണ്ടായത് കടുത്ത സേവന വീഴ്ചയും ചൂഷണവുമാണെന്ന് വ്യക്തമാക്കിയാണ് കോടതി വിധി പുറപ്പെടുവിച്ചത്.
യുവതിക്ക് ലഭിക്കാനുള്ള 86,000 രൂപ വാർഷിക പലിശ സഹിതം തിരികെ നൽകാനാണ് കോടതി നിർദ്ദേശം. ഇതിന് പുറമെ ഉപഭോക്താവിന് നേരിടേണ്ടി വന്ന മാനസിക ബുദ്ധിമുട്ടുകൾക്ക് നഷ്ടപരിഹാരവും കോടതിച്ചെലവും കമ്പനി നൽകണം. പണം വാങ്ങി ഉപഭോക്താക്കളെ വഞ്ചിക്കുന്ന ഓൺലൈൻ ട്രാവൽ ഏജൻസികൾക്കുള്ള ശക്തമായ മുന്നറിയിപ്പാണ് ഈ വിധിയെന്ന് നിയമവിദഗ്ധർ വിലയിരുത്തുന്നു. വാർത്ത ഇതിനകം തന്നെ സോഷ്യൽ മീഡിയയിലും യാത്രാ ഗ്രൂപ്പുകളിലും വൻ ചർച്ചയായിക്കഴിഞ്ഞു.
