മുംബൈ: കഴിഞ്ഞ മൂന്ന് വർഷത്തിനിടെ മുംബൈ നഗരത്തിൽ നവജാതശിശുക്കളുടെയും ഗർഭിണികളുടെയും മരണനിരക്കിൽ വലിയ കുറവ് രേഖപ്പെടുത്തി. ബൃഹന്മുംബൈ കോർപ്പറേഷൻ (BMC) പൊതുജനാരോഗ്യ വിഭാഗം പുറത്തുവിട്ട ഏറ്റവും പുതിയ കണക്കുകളിലാണ് നഗരത്തിന് ആശ്വാസമേകുന്ന ഈ വിവരമുള്ളത്.

കണക്കുകൾ പ്രകാരം 2022-23 കാലയളവിൽ 2,434 ആയിരുന്ന ശിശുമരണം, 2024-25ൽ 2,165 ആയി കുറഞ്ഞു. ജനിച്ചയുടനെയുള്ള കുട്ടികളുടെ മരണം (നവജാതശിശു മരണം) 1,510ൽ നിന്നും 1,328 ആയും, മാതൃമരണം 252ൽ നിന്നും 190 ആയും ചുരുങ്ങിയിട്ടുണ്ട്.

ഉയർന്ന അപകടസാധ്യതയുള്ള ഗർഭിണികളെ നേരത്തെ കണ്ടെത്തി പ്രസവത്തിനു മുൻപുള്ള പരിചരണം കൃത്യമായി ഉറപ്പാക്കിയതാണ് മാതൃമരണങ്ങൾ കുറയ്ക്കാൻ സഹായിച്ചതെന്ന് ബിഎംസി എക്സിക്യൂട്ടീവ് ഹെൽത്ത് ഓഫീസർ ഡെന്നിസ് അൽമേഡ (Dennis Almeida) പറഞ്ഞു. ആരോഗ്യ ഇൻഫ്രാസ്ട്രക്ചറിലുണ്ടായ വികസനവും നവജാതശിശു തീവ്രപരിചരണ വിഭാഗങ്ങൾ (NICU) കാര്യക്ഷമമാക്കിയതുമാണ് ശിശുമരണ നിരക്ക് കുറച്ചതെന്ന് ബിഎംസി ഹെൽത്ത് ഓഫീസർ ഡോ. ലക്ഷ്മൺ ചവാൻ (Dr. Laxman Chavan) ചൂണ്ടിക്കാട്ടി. ചേരികളിൽ നടത്തിയ പ്രത്യേക മെഡിക്കൽ ക്യാമ്പുകളും ഈ നേട്ടത്തിന് ആക്കം കൂട്ടി.