മുംബൈ: കഠിനാധ്വാനവും ആത്മവിശ്വാസവും കൈമുതലാക്കി മുംബൈ ഫയർ ബ്രിഗേഡിന്റെ ചരിത്രത്തിലേക്ക് വണ്ടിയോടിച്ചുകയറി ഇരുപത്തൊൻപതുകാരിയായ പല്ലവി പാട്ടീൽ. വകുപ്പിലെ ആദ്യത്തെ സജീവ വനിതാ ഫയർ എഞ്ചിൻ ഡ്രൈവറായി ചുമതലയേറ്റാണ് പല്ലവി മാതൃകയായത്. അടിയന്തിര ഘട്ടങ്ങളിൽ അതിവേഗം അഗ്നിശമന വാഹനം നിയന്ത്രിച്ച് അപകടസ്ഥലത്ത് എത്തിക്കുക എന്ന സുപ്രധാന ഉത്തരവാദിത്തമാണ് ഇനി ഈ യുവതിക്ക്.
മുംബൈയിലെ 26/11 ഭീകരാക്രമണത്തിന് ശേഷമാണ് ഫയർ ഫോഴ്സിലേക്ക് സ്ത്രീകളെ ഉൾപ്പെടുത്താൻ തീരുമാനിക്കുന്നത്. നിലവിൽ 116 വനിതാ ഫയർ ഫൈറ്റർമാർ ഇവിടെ സേവനമനുഷ്ഠിക്കുന്നുണ്ട്. 2017-ൽ ഫയർ വുമണായി ജോലിയിൽ പ്രവേശിച്ച പല്ലവി, 8 വർഷത്തെ അനുഭവസമ്പത്തിനു ശേഷമാണ് ഡ്രൈവർ സീറ്റിലേക്ക് ഉയരുന്നത്. ഗോരേഗാവിലെ ദിൻദോഷി ഡിപ്പോയിൽ പ്രത്യേക പരിശീലനം പൂർത്തിയാക്കി ഡ്രൈവിങ് ടെസ്റ്റ് പാസായ പല്ലവി, ഇപ്പോൾ ബാന്ദ്ര ഫയർ സ്റ്റേഷനിലാണ് ജോലി ചെയ്യുന്നത്. മറ്റൊരു വനിതാ ഫയർ ഫൈറ്റർ കൂടി ഈ പദവിക്ക് യോഗ്യത നേടിയിട്ടുണ്ടെങ്കിലും അവർ നിലവിൽ പ്രസവാവധിയിലായതിനാൽ, സേവനരംഗത്തുള്ള ഏക സജീവ വനിതാ ഡ്രൈവർ പല്ലവിയാണ്.
ഗ്രാമത്തിൽ വച്ച് എംഐഡിസിയിലെ (MIDC) ഫയർ ഫൈറ്ററായ തന്റെ സഹോദരൻ പുലർച്ചെ പരിശീലനത്തിന് പോകുമ്പോൾ കൂട്ട് പോയിരുന്ന പെൺകുട്ടിയിൽ നിന്നാണ് പല്ലവിയുടെ ഈ നേട്ടത്തിലേക്കുള്ള തുടക്കം. സഹോദരനും പല്ലവിക്കും ഫയർ ഫോഴ്സിൽ ചേരാൻ വഴികാട്ടിയത് അച്ഛനായിരുന്നു. മുംബൈയിൽ വനിതകൾക്കായി റിക്രൂട്ട്മെന്റ് തുടങ്ങിയപ്പോൾ അച്ഛനാണ് പല്ലവിയെ മുംബൈയിലേക്ക് കൂട്ടിക്കൊണ്ടുവന്നതും ഈ ജോലിയിലേക്ക് എത്തിച്ചതും.
ഫയർ എഞ്ചിൻ ഓടിക്കുക മാത്രമല്ല, അപകടസ്ഥലത്ത് എത്തിയാൽ എഞ്ചിനിലെ പമ്പ് പ്രവർത്തിപ്പിച്ചു വെള്ളത്തിന്റെ പ്രഷർ നിയന്ത്രിക്കേണ്ടതും പല്ലവിയുടെ ചുമതലയാണ്. മുംബൈയിലെ തിരക്കേറിയ റോഡുകളിലൂടെയും ഇടുങ്ങിയ ഗലികളിലൂടെയും വലിയ വാഹനം ഓടിക്കുന്നത് വെല്ലുവിളിയാണെങ്കിലും, ആറ് വയസുകാരനായ മകൻ യഥാർത്ഥിനെ (Yatharth) പിരിഞ്ഞിരിക്കേണ്ടി വരുന്നതാണ് തനിക്ക് ഏറ്റവും പ്രയാസമെന്ന് ഈ അമ്മ പറയുന്നു. പല്ലവിയുടെ ഭർത്താവ് സമധാൻ പാട്ടീലും (Samdhan Patil) ഇതേ വകുപ്പിൽ ഫയർ എഞ്ചിൻ ഡ്രൈവറാണ്. ഇരുവരും ഷിഫ്റ്റുകൾ ക്രമീകരിച്ചാണ് മകന്റെ കാര്യങ്ങൾ നോക്കുന്നത്. യൂണിഫോം ധരിച്ചാൽ മനുഷ്യജീവനുകൾ രക്ഷിക്കുക എന്ന ഒരൊറ്റ ചിന്ത മാത്രമേ മനസ്സിലുള്ളൂവെന്ന് പല്ലവി വ്യക്തമാക്കുന്നു.
