നവി മുംബൈ: മാസങ്ങളായി വേർപിരിഞ്ഞു താമസിച്ച്, വിവാഹമോചനം തേടി കോടതിയെ സമീപിച്ച നാല് ദമ്പതികൾ ഭിന്നതകൾ മറന്ന് വീണ്ടും ഒന്നിച്ചു ജീവിക്കാൻ തീരുമാനിച്ചു. നവി മുംബൈ ബെലാപ്പൂരിലെ ഫാമിലി കോടതിയിൽ നടന്ന ദേശീയ ലോക് അദാലത്തിലെ കൗൺസിലിങ്ങിനും മധ്യസ്ഥതയ്ക്കും ഒടുവിലാണ് വേർപിരിയലിന്റെ വക്കിലെത്തിയ ദമ്പതികൾ വീണ്ടും ഒന്നിച്ചത്.

മഹാരാഷ്ട്ര സ്റ്റേറ്റ് ലീഗൽ സർവീസസ് അതോറിറ്റിയുടെ കീഴിൽ സെപ്റ്റംബർ 12-നാണ് ദേശീയ ലോക് അദാലത്ത് സംഘടിപ്പിച്ചത്. ന്യായാധിപന്മാരും അഭിഭാഷകരും കൗൺസിലർമാരും ചേർന്ന് നടത്തുന്ന കൗൺസിലിങ്ങിലൂടെയും ആശയവിനിമയത്തിലൂടെയും പരസ്പര ധാരണ വളർത്തിയെടുക്കാൻ ദമ്പതികളെ പ്രേരിപ്പിച്ചു. വിവാഹബന്ധം വേർപെടുത്തുന്നതിന് പകരം സംഭാഷണങ്ങളിലൂടെ പ്രശ്നങ്ങൾ പരിഹരിക്കാൻ ഇവർ മുന്നോട്ടുവരികയായിരുന്നു.

താനെ ജില്ലാ ലീഗൽ സർവീസസ് അതോറിറ്റി ചെയർമാനും പ്രിൻസിപ്പൽ ജില്ലാ ആൻഡ് സെഷൻസ് ജഡ്ജിയുമായ ആർ.ഡി. സാവന്ത്, ബെലാപ്പൂർ ഫാമിലി കോടതി പ്രിൻസിപ്പൽ ജഡ്ജ് സുഭാഷ് ആർ. കാഫ്രെ, താലൂക്ക് ലീഗൽ സർവീസസ് കമ്മിറ്റി ചെയർമാനും ബെലാപ്പൂർ ജില്ലാ ജഡ്ജിയുമായ സി.വി. മറാഠെ, താനെ ജില്ലാ ലീഗൽ സർവീസസ് അതോറിറ്റി സെക്രട്ടറി രവീന്ദ്ര പാൽജങ്കർ എന്നിവരുടെ മാർഗനിർദേശപ്രകാരമാണ് അദാലത്ത് സംഘടിപ്പിച്ചത്.

​ബെലാപ്പൂർ ജില്ലാ ജഡ്ജ് പി.എസ്. ചന്ദുഗഡെ പാനൽ മേധാവിയായും നവി മുംബൈ ബാർ അസോസിയേഷനിലെ അഡ്വക്കറ്റ് ഗായത്രി കാളെ പാനൽ അംഗമായും പ്രവർത്തിച്ചു.

നിലവിൽ ബെലാപ്പൂരിലെ ഫാമിലി കോടതിയിൽ 1,406 കുടുംബ തർക്ക കേസുകൾ കെട്ടിക്കിടക്കുന്നുണ്ട്. ഇതിൽ 44 കേസുകളാണ് ലോക് അദാലത്തിൽ പരിഗണിച്ചത്. ഏഴ് കേസുകളിൽ ഒത്തുതീർപ്പിലെത്തുകയും, അതിൽ നാല് ദമ്പതികൾ വിവാഹമോചന നീക്കത്തിൽനിന്ന് പിന്മാറി ഒന്നിച്ചു ജീവിക്കാൻ തീരുമാനിക്കുകയുമായിരുന്നു.

എല്ലാ ദാമ്പത്യത്തിലും തർക്കങ്ങൾ സ്വാഭാവികമാണെന്നും എന്നാൽ വിവാഹമോചനം മാത്രമല്ല അതിനുള്ള പരിഹാരമാർഗമെന്നും പ്രിൻസിപ്പൽ ജഡ്ജ് സുഭാഷ് കാഫ്രെ പറഞ്ഞു. പരസ്പരമുള്ള ആശയവിനിമയത്തിലൂടെയും ധാരണയിലൂടെയും ഭിന്നതകൾ പരിഹരിക്കാനാകും. ലോക് അദാലത്ത് കേസുകൾ തീർപ്പാക്കാനുള്ള ഒരു വേദി മാത്രമല്ല, അകന്നുപോയ മനസ്സുകളെ ഒന്നിച്ചുചേർക്കാനുള്ള ഒരു പ്ലാറ്റ്‌ഫോം കൂടിയാണെന്നും അദ്ദേഹം കൂട്ടിച്ചേർത്തു.

വീണ്ടും ഒന്നിക്കാൻ തീരുമാനിച്ച നാല് ദമ്പതികളെയും ‘നന്ദ സൗഖ്യഭരെ’ എന്ന സന്ദേശമടങ്ങുന്ന സർട്ടിഫിക്കറ്റുകളും സമ്മാനങ്ങളും നൽകി നവി മുംബൈ ബാർ അസോസിയേഷൻ ആദരിച്ചു.

നവി മുംബൈ ബാർ അസോസിയേഷൻ പ്രസിഡന്റ് അഡ്വക്കറ്റ് സുനിൽ മോക്കൽ, വൈസ് പ്രസിഡന്റ് അഡ്വക്കറ്റ് സന്ദീപ് രാംകർ, സെക്രട്ടറി അഡ്വക്കറ്റ് വികാസ് മ्हाത്രെ, ട്രഷറർ അഡ്വക്കറ്റ് തുഷാർ റാവുത്ത്, എക്സിക്യൂട്ടീവ് കമ്മിറ്റി അംഗങ്ങൾ, താലൂക്ക് ലീഗൽ സർവീസസ് കമ്മിറ്റി ജീവനക്കാർ, ബെലാപ്പൂർ ഫാമിലി കോടതിയിലെ ജീവനക്കാർ എന്നിവരുടെ പിന്തുണയോടെയാണ് ലോക് അദാലത്ത് വിജയകരമായി പൂർത്തിയാക്കിയത്.