മുംബൈ: മുംബൈയിലേക്ക് പെട്രോളിയം വാതകം (എൽപിജി) എത്തിക്കുന്ന ടാങ്കർ കപ്പൽ ഹോർമുസ് കടലിടുക്ക് സുരക്ഷിതമായി കടന്നതായി റിപ്പോർട്ട്. പശ്ചിമ എഷ്യയിൽ തുടരുന്ന സംഘർഷാന്തരീക്ഷത്തിനിടയിലായതിനാൽ കപ്പലിന്റെ യാത്ര പ്രത്യേക ശ്രദ്ധ നേടി.
ഇറാനും ഒമാനും തമ്മിലുള്ള ഹോർമുസ് കടലിടുക്ക് ആഗോള ഇന്ധന ഗതാഗതത്തിന്റെ പ്രധാന വഴിയായതിനാൽ ഇവിടെ സുരക്ഷാ ആശങ്കകൾ ശക്തമായിരുന്നു. ഈ സാഹചര്യത്തിലാണ് ഇന്ത്യയിലേക്കുള്ള എൽപിജി ചരക്ക് തടസ്സമില്ലാതെ കടന്നുപോയത് ആശ്വാസകരമായി വിലയിരുത്തപ്പെടുന്നത്.
മുംബൈയിലേക്കുള്ള ഈ കപ്പൽ രാജ്യത്തെ ഇന്ധനവിതരണ ശൃംഖലയിലെ നിർണായക ഘടകമാണ്. വിതരണം ബാധിക്കുമോയെന്ന ആശങ്കകൾ നിലനിന്നിരുന്നുവെങ്കിലും കപ്പൽ ഇപ്പോൾ ലക്ഷ്യസ്ഥാനത്തേക്ക് യാത്ര തുടരുന്നതായി ബന്ധപ്പെട്ട വൃത്തങ്ങൾ അറിയിച്ചു.
അതേസമയം സാഹചര്യം തുടര്ന്നും സംഘർഷഭരിതമായ നിലയിൽ തുടരുന്നതിനാൽ, ഇന്ധനവിതരണവുമായി ബന്ധപ്പെട്ട എല്ലാ നീക്കങ്ങളും ഇന്ത്യ സൂക്ഷ്മമായി നിരീക്ഷിക്കുന്നതായി അധികൃതർ വ്യക്തമാക്കി.
