മുംബൈ: മുംബൈ കോർപ്പറേഷൻ (BMC) തിരഞ്ഞെടുപ്പ് ഫലം പുറത്തുവന്നതിന് പിന്നാലെ നഗരത്തെ ഞെട്ടിച്ച് വൻ രാഷ്ട്രീയ-നിയമ പ്രതിസന്ധി. പുതുതായി തിരഞ്ഞെടുക്കപ്പെട്ട 79 കോർപ്പറേറ്റർമാരുടെ വിജയത്തിന്റെ സാധുത ചോദ്യം ചെയ്ത് പരാജയപ്പെട്ട സ്ഥാനാർത്ഥികളും വിവിധ രാഷ്ട്രീയ പാർട്ടികളും കോടതിയെ സമീപിച്ചു. വോട്ടെണ്ണലിലെ ക്രമക്കേടുകൾ, നാമനിർദ്ദേശ പത്രികകളിലെ പോരായ്മകൾ, പെരുമാറ്റച്ചട്ട ലംഘനം തുടങ്ങിയ ഗുരുതരമായ ആരോപണങ്ങൾ ഉന്നയിച്ചാണ് മുംബൈയിലെ വിവിധ കോടതികളിൽ കൗൺസിലർമാർക്കെതിരെ കൂട്ടത്തോടെ തിരഞ്ഞെടുപ്പ് ഹർജികൾ (Election Petitions) ഫയൽ ചെയ്തിരിക്കുന്നത്.

ബിഎംസിയുടെ ചരിത്രത്തിൽ ഇത്രയധികം കൗൺസിലർമാരുടെ വിജയം ഒന്നിച്ച് കോടതി കയറുന്നത് ഇതാദ്യമായാണ്. തിരഞ്ഞെടുപ്പ് ഉദ്യോഗസ്ഥർ വോട്ടെണ്ണൽ സമയത്ത് ഭരണകക്ഷിക്ക് അനുകൂലമായി നിലപാടെടുത്തു എന്നും, വോട്ടിങ് യന്ത്രങ്ങളിൽ (EVM) അട്ടിമറി നടന്നു എന്നുമാണ് പ്രതിപക്ഷ പാർട്ടികളുടെ പ്രധാന ആരോപണം. കൂടാതെ, നിരവധി സ്ഥാനാർത്ഥികൾ തങ്ങളുടെ സ്വത്ത് വിവരങ്ങളും ക്രിമിനൽ പശ്ചാത്തലവും സത്യവാങ്മൂലത്തിൽ മറച്ചുവെച്ചതായും ഹർജികളിൽ ചൂണ്ടിക്കാണിക്കുന്നു. രാഷ്ട്രീയ പാർട്ടികൾക്ക് പുറമെ ചില സ്വതന്ത്ര സ്ഥാനാർത്ഥികളും കോടതിയെ സമീപിച്ചിട്ടുണ്ട്.

ഹർജികളിൽ കോടതി സ്വീകരിക്കുന്ന നിലപാട് മുംബൈ കോർപ്പറേഷന്റെ ഭരണത്തെത്തന്നെ വരുംദിവസങ്ങളിൽ സ്വാധീനിച്ചേക്കാം. ആരോപണവിധേയരായ 79 പേരിൽ ഭരണപക്ഷത്തെയും പ്രതിപക്ഷത്തെയും പ്രമുഖ നേതാക്കൾ ഉൾപ്പെടുന്നുണ്ട്. കോടതി ഹർജികൾ ഫയലിൽ സ്വീകരിച്ച് വിശദമായ വാദം കേൾക്കാൻ തുടങ്ങിയതോടെ പല വാർഡുകളിലും വീണ്ടും തിരഞ്ഞെടുപ്പ് നടത്തേണ്ടി വരുമോ എന്ന ആശങ്കയിലാണ് രാഷ്ട്രീയ കേന്ദ്രങ്ങൾ. ഭരണം നിലനിർത്താനും അട്ടിമറിക്കാനും മുന്നണികൾ രാജ്യത്തെ പ്രമുഖ അഭിഭാഷകരെത്തന്നെ രംഗത്തിറക്കി വൻ നിയമപോരാട്ടത്തിനാണ് തയ്യാറെടുക്കുന്നത്.

ഹർജികളന്മേൽ അടിയന്തരമായി വാദം കേൾക്കണമെന്നും തിരഞ്ഞെടുപ്പ് രേഖകളും വോട്ടിങ് യന്ത്രങ്ങളും സുരക്ഷിതമായി സൂക്ഷിക്കാൻ സംസ്ഥാന തിരഞ്ഞെടുപ്പ് കമ്മീഷന് നിർദ്ദേശം നൽകണമെന്നും ഹർജിക്കാർ കോടതിയോട് ആവശ്യപ്പെട്ടിട്ടുണ്ട്. വരും ദിവസങ്ങളിൽ കോടതികൾ ഈ ഹർജികളിൽ പ്രാഥമിക വാദം കേൾക്കും. നഗരസഭയുടെ അധ്യക്ഷ പദവികളിലേക്കുള്ള തിരഞ്ഞെടുപ്പ് നടക്കാനിരിക്കെ, കൗൺസിലർമാർക്കെതിരെയുള്ള ഈ നിയമനടപടികൾ മുംബൈ രാഷ്ട്രീയത്തിൽ വൻ അനിശ്ചിതത്വമാണ്സൃഷ്ടിച്ചിരിക്കുന്നത്.