മുംബൈ: തലച്ചോറിലേക്ക് കത്തി കുത്തിക്കയറിയ അതീവ ഗുരുതരാവസ്ഥയിൽ പ്രവേശിപ്പിക്കപ്പെട്ട 27 കാരന്റെ ജീവൻ രക്ഷിച്ച് അപൂർവ മെഡിക്കൽ നേട്ടം കുറിച്ച് സയൺ ആശുപത്രി. അതിവേഗവും കൃത്യതയാർന്ന ശസ്ത്രക്രിയയിലൂടെയാണ് യുവാവിനെ മരണത്തിന്റെ വക്കിൽ നിന്ന് തിരിച്ചെത്തിച്ചത്.

പരിക്കേറ്റ യുവാവിനെ ഗുരുതരാവസ്ഥയിൽ ആശുപത്രിയിൽ എത്തിച്ചപ്പോൾ, തലച്ചോറിനുള്ളിലേക്ക് കത്തി കയറിയ നിലയിലായിരുന്നു. ജീവൻ നിലനിർത്തുന്നതിന് അത്യാഹിത ശസ്ത്രക്രിയ അനിവാര്യമായതിനാൽ ഡോക്ടർമാർ ഉടൻ നടപടികൾ ആരംഭിച്ചു.

ന്യുറോസർജൻമാരുടെ നേതൃത്വത്തിൽ നടന്ന ശസ്ത്രക്രിയ മണിക്കൂറുകൾ നീണ്ടുനിന്നു. അതീവ സൂക്ഷ്മത ആവശ്യമായ ഈ ശസ്ത്രക്രിയയിൽ, തലച്ചോറിന് കൂടുതൽ കേടുപാടുകൾ വരാതെ കത്തി സുരക്ഷിതമായി പുറത്തെടുക്കാൻ ഡോക്ടർമാർക്ക് കഴിഞ്ഞു.

ശസ്ത്രക്രിയക്ക് പിന്നാലെ യുവാവിന്റെ ആരോഗ്യനില സ്ഥിരതയിലായതായി ആശുപത്രി അധികൃതർ അറിയിച്ചു. സമയോചിതമായ ഇടപെടലും വൈദ്യസംഘത്തിന്റെ മികവും ചേർന്നാണ് ജീവൻ രക്ഷിക്കാനായത്