താനെ: സഞ്ജയ് ഗാന്ധി നാഷണൽ പാർക്കിന്റെ മലയോര മേഖലയിലെ ആദിവാസി കുട്ടികൾക്ക് അറിവിന്റെ വെളിച്ചമേകാൻ കാരുണ്യത്തിന്റെ കൈത്താങ്ങുമായി ഹിൽ ഗാർഡൻ അയ്യപ്പ ഭക്ത സംഘം (HGABS). താനെയിലെ കൊങ്കണിപാഡ മുനിസിപ്പൽ സ്കൂളിലെ സാമ്പത്തികമായി പിന്നാക്കം നിൽക്കുന്ന വിദ്യാർത്ഥികൾക്കായാണ് സംഘടനയുടെ നേതൃത്വത്തിൽ പഠനോപകരണ വിതരണം സംഘടിപ്പിച്ചത്. തുടർച്ചയായി പതിനഞ്ചാം വർഷമാണ് ഹിൽഗാർഡൻ അയ്യപ്പഭക്തസംഘം ഈ സ്കൂളിലെ കുട്ടികൾക്ക് തുണയാകുന്നത്.
ജൂൺ 23-ന് രാവിലെ 10.30-ന് ആരംഭിച്ച വിതരണ പരിപാടി രണ്ട് സെഷനുകളായാണ് ക്രമീകരിച്ചത്. രാവിലെ നടന്ന ആദ്യ സെഷനിൽ ബാലവാടിയിലെ കുട്ടികൾക്കും അഞ്ചാം ക്ലാസ് മുതൽ എട്ടാം ക്ലാസ് വരെയുള്ള വിദ്യാർത്ഥികൾക്കും പഠനോപകരണങ്ങൾ നൽകി. ഉച്ചയ്ക്കുശേഷം ഒന്നാം ക്ലാസ് മുതൽ നാലാം ക്ലാസ് വരെയുള്ള വിദ്യാർത്ഥികൾക്കുള്ള വിതരണവും പൂർത്തിയായി. ബാലവാടി മുതൽ എട്ടാം ക്ലാസ് വരെയുള്ള ഏകദേശം 150-ഓളം വിദ്യാർത്ഥികളാണ് ഈ വിദ്യാലയത്തിൽ പഠിക്കുന്നത്.
താനെ വൈഭവ് ദിനപത്രത്തിന്റെ ചീഫ് എഡിറ്റർ ശ്രീ. നിഖിൽ ബല്ലാൽ ചടങ്ങിൽ മുഖ്യാതിഥിയായിരുന്നു. ലളിതമായ കഥകളിലൂടെ കുട്ടികളോട് സംവദിച്ച അദ്ദേഹം അറിവിന്റെ പ്രാധാന്യം പങ്കുവെച്ചു. മുലുണ്ട് വാജെ വിദ്യാലയത്തിലെ വിരമിച്ച പ്രിൻസിപ്പൽ ശ്രീമതി പൂജാ ചൊഗുലെയും ചടങ്ങിൽ കുട്ടികളെ അഭിസംബോധന ചെയ്ത് സംസാരിച്ചു.
സ്കൂളിന്റെ ആവശ്യങ്ങൾ അറിഞ്ഞ് കഴിഞ്ഞ 15 വർഷമായി തുടർച്ചയായി പിന്തുണ നൽകുന്ന ഹിൽ ഗാർഡൻ അയ്യപ്പ ഭക്ത സംഘത്തെയും അതിന്റെ ഭാരവാഹികളെയും സ്കൂൾ ഹെഡ്മിസ്ട്രസ് ശ്രീമതി ഉർമിള ആർ. ഗവ്ലെ, സീനിയർ ടീച്ചർ ശ്രീമതി സംഗീത സുരേന്ദ്ര ദേവരെ എന്നിവർ നന്ദിപൂർവം അഭിനന്ദിച്ചു.
HGABS സെക്രട്ടറി ശശികുമാർ നായർ ചടങ്ങിൽ സംസാരിക്കുകയും, ഈ മഹത്തായ ജീവകാരുണ്യ പ്രവർത്തനത്തിന് സ്വമേധയാ പിന്തുണ പ്രഖ്യാപിച്ച എല്ലാ അഭ്യുദയകാംക്ഷികൾക്കും നന്ദി രേഖപ്പെടുത്തുകയും ചെയ്തു. ചടങ്ങിൽ സ്കൂളിനെ പ്രതിനിധീകരിച്ച് ആറാം ക്ലാസ് വിദ്യാർത്ഥിനിയായ ഷെജാൽ ധേബെ നന്ദിപ്രസംഗം നടത്തി. തുടർന്ന് HGABS വോളണ്ടിയർമാർ എല്ലാ കുട്ടികൾക്കും ലഘുഭക്ഷണവും വിതരണം ചെയ്തു.
HGABS ഭാരവാഹികളായ കെ.ജി. കുട്ടി, ശശികുമാർ നായർ, രമേശ് ഗോപാലൻ, ഹരിഹരൻ, മിലിന്ദ് ജോഷി എന്നിവർ പരിപാടികൾക്ക് നേതൃത്വം നൽകി. 31 വർഷം മുമ്പ് രൂപീകൃതമായ ഹിൽ ഗാർഡൻ അയ്യപ്പ ഭക്ത സംഘം, അതിന്റെ തുടക്കം മുതൽ തന്നെ സമൂഹത്തിലെ പാർശ്വവത്കരിക്കപ്പെട്ടവർക്കായി നിരവധി സാമൂഹിക-ജീവകാരുണ്യ പ്രവർത്തനങ്ങളാണ് നടത്തിവരുന്നത്.
