മുംബൈ: ഉപനഗര റെയിൽ സേവനത്തിലെ സുരക്ഷയെ ചോദ്യം ചെയ്യുന്ന ഗുരുതര സംഭവത്തിൽ, വിലെ പാർലെ സ്റ്റേഷനിൽ ഡ്യൂട്ടിയിലുണ്ടായിരുന്ന ലോക്കൽ ട്രെയിൻ ഗാർഡിനെ ഹോം ഗാർഡ് ആക്രമിച്ചതായി റിപ്പോർട്ട്. സംഭവത്തിൽ ഇതുവരെ എഫ്.ഐ.ആർ രജിസ്റ്റർ ചെയ്യാത്തതിനെതിരെ റെയിൽവേ ജീവനക്കാർ ശക്തമായ പ്രതിഷേധവുമായി രംഗത്തെത്തി.
ചർച്ച്ഗേറ്റ്–ബോറിവലി ലോക്കൽ സർവീസിനിടെയാണ് സംഭവം. വനിതാ കോച്ചിന്റെ പ്രവേശന കവാടം തടസ്സപ്പെടുത്തി നിൽക്കുകയായിരുന്ന ഹോം ഗാർഡുകളോട്, യാത്രക്കാരുടെ സുരക്ഷ കണക്കിലെടുത്ത് മാറിനിൽക്കണമെന്ന് ഗാർഡ് നിർദ്ദേശിച്ചു. ഇതിനെ തുടർന്ന് വാക്കുതർക്കം ഉണ്ടാകുകയും സാഹചര്യം സംഘർഷത്തിലേക്ക് നീങ്ങുകയും ചെയ്തു.
ട്രെയിൻ വിലെ പാർലെ സ്റ്റേഷനിലെത്തിയപ്പോൾ, ഹോം ഗാർഡായ മനോജ് സാവന്ത് ഗാർഡിനെ തള്ളിയിടുകയും കാൽകൊണ്ട് ആക്രമിക്കുകയും ചെയ്തതായി ആരോപണം. ആക്രമണത്തിൽ ഗാർഡിന് പരിക്കേറ്റതായും സംഭവവുമായി ബന്ധപ്പെട്ട ദൃശ്യങ്ങൾ പരിശോധിച്ചുവരുന്നതായും അധികൃതർ അറിയിച്ചു.
സംഭവത്തിന് പിന്നാലെ, ട്രെയിൻ മാനേജർമാർ അന്ധേരി ജി.ആർ.പി സ്റ്റേഷനിൽ എത്തി പ്രതിഷേധിച്ചു. കേസിൽ എഫ്.ഐ.ആർ രജിസ്റ്റർ ചെയ്യണമെന്നാവശ്യപ്പെട്ടതായി അടുത്ത വൃത്തങ്ങൾ അറിയിച്ചു.
സർക്കാർ ജീവനക്കാരന്റെ ഔദ്യോഗിക ചുമതല നിർവഹണത്തെ തടസ്സപ്പെടുത്തുന്ന ഗുരുതര വകുപ്പുകൾ ചേർക്കാതിരുന്നത് കേസിനെ ലഘൂകരിക്കാനുള്ള ശ്രമമാണെന്ന് റെയിൽവേ ജീവനക്കാർ ആരോപിക്കുന്നു. നിയമോപദേശം ലഭിച്ച ശേഷം കൂടുതൽ വകുപ്പുകൾ ചേർക്കുന്നതിനെക്കുറിച്ച് പരിഗണിക്കാമെന്ന നിലപാടിലാണ് ജി.ആർ.പി.
