മുംബൈ: തെരുവിന്റെ അനിശ്ചിതത്വങ്ങളിൽ നിന്നും മഹാരാഷ്ട്ര പോലീസ് സേനയുടെ അഭിമാന നിമിഷങ്ങളിലേക്ക് മൂന്ന് യുവാക്കളുടെ അതിശയകരമായ ചുവടുമാറ്റം. വഡാലയിലെ ‘ഷെൽട്ടർ ഡോൺ ബോസ്കോ’ എന്ന സ്ഥാപനത്തിലൂടെ ജീവിതത്തിന് പുതിയ ദിശാബോധം കണ്ടെത്തിയ അക്ഷയ് ഗെയ്ക്വാദ്, രോഹിത് മോഹൈറ്റ്, പ്രകാശ് ബിരാദാർ എന്നീ യുവാക്കളാണ് കഠിനാധ്വാനത്തിലൂടെ പോലീസ് സേനയിൽ അംഗങ്ങളായത്.
കുടുംബ പശ്ചാത്തലമില്ലായ്മയും കടുത്ത പ്രതിസന്ധികളും നേരിട്ട ഈ യുവാക്കളെ കുട്ടിക്കാലത്താണ് ഡോൺ ബോസ്കോ ഷെൽട്ടർ ഹോമിൽ എത്തിക്കുന്നത്. സ്ഥാപനത്തിൽ നിന്ന് ലഭിച്ച കൃത്യമായ വിദ്യാഭ്യാസവും കൗൺസിലിംഗും കായിക പരിശീലനവുമാണ് ഇവരെ ലക്ഷ്യബോധമുള്ളവരാക്കി മാറ്റിയത്. കുട്ടികളുടെ കഴിവുകളെ തിരിച്ചറിഞ്ഞ് അവരെ സമൂഹത്തിന്റെ മുൻനിരയിലേക്ക് കൊണ്ടുവരുന്നതിൽ ഡോൺ ബോസ്കോ സ്ഥാപനം വഹിക്കുന്ന പങ്കിന്റെ ഉത്തമ ഉദാഹരണമാണ് ഈ നേട്ടം.
കഠിനമായ പ്രവേശന പരീക്ഷകളും ശാരീരികക്ഷമതാ പരിശോധനകളും പൂർത്തിയാക്കിയാണ് ഇവർ മൂവരും മഹാരാഷ്ട്ര പോലീസിന്റെ ഭാഗമായത്. തങ്ങളെ ഒരു നല്ല മനുഷ്യനാക്കി മാറ്റിയതിനും ജീവിതത്തിൽ വിജയിക്കാൻ പ്രാപ്തരാക്കിയതിനും ഷെൽട്ടർ ഡോൺ ബോസ്കോയോടും അവിടുത്തെ അധ്യാപകരോടും ജീവനക്കാരോടും തങ്ങൾ എന്നും കടപ്പെട്ടിരിക്കുന്നുവെന്ന് ഈ യുവാക്കൾ കൃതജ്ഞതയോടെ ഓർക്കുന്നു.
സമൂഹത്തിൽ പാർശ്വവൽക്കരിക്കപ്പെട്ട കുട്ടികൾക്ക് പുതിയൊരു ജീവിതം പടുത്തുയർത്താൻ ‘ഷെൽട്ടർ ഡോൺ ബോസ്കോ’ നടത്തുന്ന നിരന്തരമായ ശ്രമങ്ങൾക്കുള്ള വലിയൊരു അംഗീകാരം കൂടിയാണ് അക്ഷയ്, രോഹിത്, പ്രകാശ് എന്നിവരുടെ ഈ വിജയഗാഥ.
