മുംബൈ: പൈധുനിയിൽ ഒരു കുടുംബത്തിലെ നാലുപേർ ഒന്നിനുപുറകെ ഒന്നായി മരണപ്പെട്ട സംഭവത്തിലെ ദുരൂഹത നീങ്ങുന്നു. തണ്ണിമത്തൻ കഴിച്ചതിനെത്തുടർന്നുണ്ടായ ഭക്ഷ്യവിഷബാധയാണെന്ന് കരുതിയ മരണങ്ങൾക്ക് കാരണം എലിവിഷമാണെന്ന് ജെ.ജെ. ആശുപത്രിയിലെ ഫൊറൻസിക് റിപ്പോർട്ട് സ്ഥിരീകരിച്ചു. മരണപ്പെട്ടവരുടെ ആന്തരികാവയവ പരിശോധനയിലാണ് വിഷാംശം കണ്ടെത്തിയത്.
മുംബൈ പൈധുനിയിലെ കുടുംബത്തിലാണ് നാടിനെ നടുക്കിയ ദുരന്തമുണ്ടായത്. തണ്ണിമത്തൻ കഴിച്ചതിന് പിന്നാലെ ശാരീരിക അസ്വസ്ഥതകൾ പ്രകടിപ്പിച്ച കുടുംബാംഗങ്ങൾ വിവിധ ആശുപത്രികളിൽ ചികിത്സയിലിരിക്കെയാണ് മരണപ്പെട്ടത്. ഭക്ഷണത്തിൽ എങ്ങനെ വിഷാംശം കലർന്നു എന്നതിനെക്കുറിച്ച് പോലീസ് അന്വേഷണം ഊർജ്ജിതമാക്കി. വീട്ടിൽ എലികളെ നശിപ്പിക്കാൻ ഉപയോഗിച്ച വിഷം അബദ്ധത്തിൽ ഭക്ഷണത്തിൽ കലർന്നതാണോ അതോ മറ്റെന്തെങ്കിലും കാരണമാണോ എന്ന് പോലീസ് പരിശോധിച്ചു വരികയാണ്.
പ്രാഥമികമായി ഇതൊരു ഭക്ഷ്യവിഷബാധയാണെന്ന് കരുതിയിരുന്നെങ്കിലും ഒരേ വീട്ടിലെ നാലുപേർ മരണപ്പെട്ടത് പോലീസിനെ സംശയത്തിലാഴ്ത്തിയിരുന്നു. ജെ.ജെ ആശുപത്രി പുറത്തുവിട്ട പുതിയ റിപ്പോർട്ടിന്റെ അടിസ്ഥാനത്തിൽ പൈധുനി പോലീസ് അന്വേഷണത്തിന്റെ ദിശ മാറ്റിയിട്ടുണ്ട്. കുടുംബാംഗങ്ങളിൽ നിന്നും അയൽവാസികളിൽ നിന്നും പോലീസ് മൊഴിയെടുക്കുന്നുണ്ട്. സംഭവത്തിൽ കൂടുതൽ വ്യക്തത വരുത്തുന്നതിനായി വിശദമായ രാസപരിശോധനാ ഫലങ്ങൾക്കായി കാത്തിരിക്കുകയാണ് അധികൃതർ.
