മുംബൈ: കുറ്റകൃത്യങ്ങൾ തെളിയിക്കുന്നതിൽ വൻ മുന്നേറ്റവുമായി മഹാരാഷ്ട്ര രാജ്യത്തെ ഏറ്റവും സുരക്ഷിതമായ സംസ്ഥാനങ്ങളുടെ പട്ടികയിലെന്ന് മുഖ്യമന്ത്രി ദേവേന്ദ്ര ഫഡ്നാവിസ് (Devendra Fadnavis). സംസ്ഥാനത്തെ കുറ്റകൃത്യങ്ങൾ കണ്ടെത്താനുള്ള നിരക്ക് (Crime Detection Rate) ചരിത്രത്തിലാദ്യമായി 82 ശതമാനമായി ഉയർന്നുവെന്ന് അദ്ദേഹം വ്യക്തമാക്കി. മുൻപ് ഇത് വെറും 42 ശതമാനം മാത്രമായിരുന്നു.
കുറ്റവാളികൾക്ക് ശിക്ഷ ഉറപ്പാക്കുന്ന നിരക്ക് (Conviction Rate) മുൻപുണ്ടായിരുന്ന 8 ശതമാനത്തിൽ നിന്നും ഇപ്പോൾ 54 ശതമാനമായി ഉയർത്താൻ സംസ്ഥാനത്തിന് സാധിച്ചതായും മുഖ്യമന്ത്രി ചൂണ്ടിക്കാട്ടി. സൈബർ കുറ്റകൃത്യങ്ങൾ തടയുന്നതിനായി പ്രത്യേക സൈബർ ലാബുകളും ഇന്റലിജൻസ് സംവിധാനങ്ങളും സംസ്ഥാനത്ത് കാര്യക്ഷമമായി പ്രവർത്തിക്കുന്നുണ്ട്.
സ്ത്രീകളുടെയും കുട്ടികളുടെയും സുരക്ഷയ്ക്കാണ് സർക്കാർ പ്രഥമ പരിഗണന നൽകുന്നത്. പ്രതിപക്ഷത്തിന്റെ വിമർശനങ്ങൾക്ക് മറുപടിയായി കണക്കുകൾ നിരത്തിയ മുഖ്യമന്ത്രി, നിക്ഷേപകർക്കും പൊതുജനങ്ങൾക്കും ഭയമില്ലാതെ ജീവിക്കാൻ സാധിക്കുന്ന മികച്ച ക്രമസമാധാന സാഹചര്യമാണ് മഹാരാഷ്ട്രയിലുള്ളതെന്നും വ്യക്തമാക്കി.
