പൂനെ: സമൂഹമാധ്യമങ്ങളിൽ കൊടുങ്കാറ്റായി മാറിയ ‘കോക്രോച്ച് ജനതാ പാർട്ടി’ (CJP) സ്ഥാപകൻ അഭിജീത് ദിപ്കെയുടെ കുടുംബത്തെ സുരക്ഷാ കാരണങ്ങളാൽ അജ്ഞാത കേന്ദ്രത്തിലേക്ക് മാറ്റി. കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനിന്റെ രാജി ആവശ്യപ്പെട്ട് ജൂൺ 6-ന് ദൽഹിയിൽ നടത്തുന്ന വൻ പ്രതിഷേധത്തിന് മുന്നോടിയായാണ് ഈ നാടകീയ നീക്കങ്ങൾ. തനിക്കും കുടുംബത്തിനും നേരെ കടുത്ത സുരക്ഷാ ഭീഷണിയുണ്ടെന്ന് ചൂണ്ടിക്കാട്ടി അഭിജീത് തന്നെയാണ് എക്സ് (ട്വിറ്റർ) ഹാൻഡിലിലൂടെ ഈ വിവരം പുറത്തുവിട്ടത്.
തന്റെ രാഷ്ട്രീയ നിലപാടുകളുടെയും പോരാട്ടങ്ങളുടെയും പേരിൽ നിരപരാധികളായ കുടുംബാംഗങ്ങളെ വേട്ടയാടാൻ അനുവദിക്കില്ലെന്ന് അഭിജീത് വ്യക്തമാക്കി. “എന്റെ കുടുംബത്തെ സുരക്ഷിതമായ ഒരു അജ്ഞാത കേന്ദ്രത്തിലേക്ക് മാറ്റിയിരിക്കുന്നു. അവരുടെ സുരക്ഷയ്ക്കാണ് ഞാൻ ഇപ്പോൾ പ്രഥമ പരിഗണന നൽകുന്നത്. രാഷ്ട്രീയമായ പോരാട്ടങ്ങൾ എന്നോട് നേരിട്ടാകാം, അതിലേക്ക് എന്റെ കുടുംബത്തെ വലിച്ചിഴയ്ക്കരുത്,” അഭിജീത് എക്സിൽ കുറിച്ചു.
അതേസമയം, കുടുംബത്തിനെതിരെയുള്ള ഭീഷണികൾക്ക് മുന്നിൽ താൻ പതറില്ലെന്നും ജൂൺ 6-ന് പ്രഖ്യാപിച്ച പ്രതിഷേധ പരിപാടികളുമായി ശക്തമായി മുന്നോട്ട് പോകുമെന്നും അദ്ദേഹം കൂട്ടിച്ചേർത്തു. പൂനെയിൽ നിന്നുള്ള ഈ യുവ നേതാവിന്റെ പ്രഖ്യാപനവും കുടുംബത്തിന്റെ അപ്രതീക്ഷിത മാറ്റവും രാഷ്ട്രീയ വൃത്തങ്ങളിലും സമൂഹമാധ്യമങ്ങളിലും വലിയ ചർച്ചകൾക്കാണ് വഴിതുറന്നിരിക്കുന്നത്. നടൻ പ്രകാശ് രാജ് ഉൾപ്പെടെയുള്ള പ്രമുഖർ ഈ പ്രസ്ഥാനത്തിന് പരസ്യ പിന്തുണ പ്രഖ്യാപിച്ചതിന് തൊട്ടുപിന്നാലെയുണ്ടായ ഈ സംഭവം വരും ദിവസങ്ങളിൽ വലിയ രാഷ്ട്രീയ പോരിലേക്ക് വഴിമാറുമെന്നാണ് സൂചന.
