മുംബൈ: ചില സഹപ്രവർത്തകരായ പൊലീസുകാരിൽ നിന്ന് കടുത്ത മാനസിക പീഡനം നേരിടേണ്ടി വന്നതായി ആരോപിച്ച് നവി മുംബൈയിൽ അസിസ്റ്റന്റ് സബ് ഇൻസ്‌പെക്ടർ (എ.എസ്.ഐ) ജീവനൊടുക്കി. നവി മുംബൈ പൊലീസിലെ എ.എസ്.ഐ പാണ്ഡുരംഗ് പാട്ടീൽ (56) ആണ് മഹപെയിലെ ലോഡ്ജിൽ തൂങ്ങിമരിച്ചത്.

സേവനവുമായി ബന്ധപ്പെട്ട് സഹപ്രവർത്തകരിൽ നിന്ന് നേരിടേണ്ടി വന്ന അനുഭവങ്ങളാണ് താൻ ഈ അവസ്ഥയിലാകാൻ കാരണമെന്ന് ആരോപിക്കുന്ന ആത്മഹത്യാക്കുറിപ്പും വീഡിയോ ദൃശ്യങ്ങളും സംഭവസ്ഥലത്തുനിന്ന് പോലീസ് കണ്ടെടുത്തു. ഇതിൽ ചില ഉദ്യോഗസ്ഥരുടെ പേരുകൾ എടുത്തുപറഞ്ഞ് പീഡന ആരോപണം ഉന്നയിച്ചിട്ടുണ്ട്.

സംഭവത്തിൽ രബാലെ എം.ഐ.ഡി.സി പൊലീസ് അസ്വാഭാവിക മരണത്തിന് കേസ് എടുത്ത് അന്വേഷണം ആരംഭിച്ചു. കണ്ടെടുത്ത കുറിപ്പും വീഡിയോ ദൃശ്യങ്ങളും ശാസ്ത്രീയ പരിശോധനയ്ക്ക് വിധേയമാക്കുമെന്നും, ആരോപണവിധേയരായ ഉദ്യോഗസ്ഥരെ ചോദ്യം ചെയ്യുമെന്നും അന്വേഷണ സംഘം അറിയിച്ചു.