മുംബൈ: സ്വർണ്ണ ശോഭയിൽ തിളങ്ങിനിൽക്കുന്ന കൂറ്റൻ സ്തൂപങ്ങളും ശാന്തസുന്ദരമായ അന്തരീക്ഷവും കണ്ടാൽ ഒറ്റനോട്ടത്തിൽ ആരും കരുതും ഇത് തായ്‌ലൻഡോ മ്യാൻമറോ ഒക്കെയാണെന്ന്. എന്നാൽ തെറ്റി, ഈ വിസ്മയക്കാഴ്ച നമ്മുടെ മുംബൈ നഗരത്തിലാണ്! മുംബൈയുടെ വടക്കുപടിഞ്ഞാറൻ തീരത്തുള്ള ഗോരായ് ദ്വീപിലാണ് ശാന്തിയുടെയും സമാധാനത്തിന്റെയും പ്രതീകമായി ‘ഗ്ലോബൽ വിപാസന പഗോഡ’ സ്ഥിതി ചെയ്യുന്നത്. നഗരത്തിന്റെ തിരക്കുകളിൽ നിന്ന് മാറി മനസ്സിന് ശാന്തത പകരാൻ ആഗ്രഹിക്കുന്ന സഞ്ചാരികളുടെ പ്രിയപ്പെട്ട കേന്ദ്രമായി മാറിയിരിക്കുകയാണ് ഈ അത്ഭുത നിർമ്മിതി.

തൂണുകളില്ലാത്ത ലോകത്തിലെ ഏറ്റവും വലിയ ഡോം!

വാസ്തുവിദ്യയുടെ വിസ്മയമെന്ന് വിശേഷിപ്പിക്കാവുന്ന ഒന്നാണ് ഇവിടുത്തെ പ്രധാന മെഡിറ്റേഷൻ ഹാൾ. യാതൊരുവിധ തൂണുകളുടെയും (Pillar) പിന്തുണയില്ലാതെ നിർമ്മിച്ച ലോകത്തിലെ ഏറ്റവും വലിയ കല്ല് കൊണ്ടുള്ള ഡോം (Dome) ആണിത്. ഏകദേശം 8,000 പേർക്ക് ഒരേസമയം ഇരുന്ന് ധ്യാനിക്കാനുള്ള വിസ്തൃതി ഈ ഹാളിനുണ്ട്. മ്യാൻമറിലെ വിഖ്യാതമായ ‘ശ്വേഡഗോൺ പഗോഡ’യുടെ (Shwedagon Pagoda) മാതൃകയിലാണ് ഇതിന്റെ രൂപകൽപ്പന നിർവ്വഹിച്ചിരിക്കുന്നത്.

മഹാരാഷ്ട്രയുടെ ഏഴ് അത്ഭുതങ്ങളിൽ ഒന്ന്

മഹാരാഷ്ട്ര ടൂറിസം ഡെവലപ്‌മെന്റ് കോർപ്പറേഷൻ (MTDC) സംസ്ഥാനത്തെ ‘ഏഴ് അത്ഭുതങ്ങളിൽ ഒന്നായി’ ഗ്ലോബൽ വിപാസന പഗോഡയെ ഔദ്യോഗികമായി പ്രഖ്യാപിച്ചിട്ടുണ്ട്. അറബിക്കടലിനും ഗോരായ് കായലിനും മധ്യേയുള്ള മനോഹരമായ പെനിൻസുലയിൽ, പൂർണ്ണമായും സൗജന്യമായി ലഭിച്ച ഭൂമിയിലാണ് ഈ സ്മാരകം ഉയർന്നുനിൽക്കുന്നത്. ഇന്ത്യയുടെ മുൻ രാഷ്ട്രപതി പ്രതിഭ പാട്ടീലാണ് ഈ പഗോഡ രാജ്യത്തിന് സമർപ്പിച്ചത്.

​മനസ്സിന് കുളിർമയേകുന്ന ‘ആനാപാന’ ധ്യാനം

ഇവിടെയെത്തുന്ന സന്ദർശകർക്കായി ‘ആനാപാന’ (Anapana Meditation) എന്ന ലളിതമായ ധ്യാനരീതി പഠിക്കാനുള്ള അപൂർവ്വ അവസരവും ഒരുക്കിയിട്ടുണ്ട്. ശ്വാസനിയന്ത്രണത്തിലൂടെ മനസ്സും ശരീരവും ഏകാഗ്രമാക്കാൻ സഹായിക്കുന്ന ഈ രീതി സന്ദർശകർക്ക് തികച്ചും സമാധാനപരമായ അന്തരീക്ഷമാണ് സമ്മാനിക്കുന്നത്. വരും ദിവസങ്ങളിൽ മുംബൈ സന്ദർശിക്കുന്ന ഏതൊരു സഞ്ചാരിയും തീർച്ചയായും കണ്ടിരിക്കേണ്ട ഒരു വിനോദസഞ്ചാര കേന്ദ്രം കൂടിയാണിത്.

എങ്ങനെ എത്തിച്ചേരാം?

​വർഷത്തിൽ എപ്പോൾ വേണമെങ്കിലും നിങ്ങൾക്ക് ഇവിടം സന്ദർശിക്കാം. എപ്പോഴും ശാന്തവും മനോഹരവുമാണ് ഈ പ്രദേശം. എന്നാൽ വർഷകാലത്ത് പഗോഡയും പരിസരവും കൂടുതൽ പച്ചപ്പണിഞ്ഞ് അതീവ സുന്ദരിയാകും. അറബിക്കടലിന്റെയും കണ്ടൽക്കാടുകളുടെയും ചുറ്റുമുള്ള പ്രകൃതിഭംഗിയുടെയും മനംമയക്കുന്ന ദൃശ്യങ്ങളാണ് ഗ്ലോബൽ വിപാസന പഗോഡ സമ്മാനിക്കുന്നത്.

ഇവിടെയെത്താൻ മുംബൈയിലെ ബോറിവലി (Borivali) റെയിൽവേ സ്റ്റേഷൻ വരെ ലോക്കൽ ട്രെയിനിൽ വരാം. അവിടെനിന്ന് ബസ്സിലോ ഓട്ടോയിലോ ഗോരായ് ക്രീക്കിൽ (Gorai Creek) എത്താം. തുടർന്ന് ഇവിടെനിന്നുള്ള ബോട്ട് സർവീസ് (Ferry) വഴി നിങ്ങൾക്ക് പഗോഡയിലേക്ക് നേരിട്ട് എത്തിച്ചേരാവുന്നതാണ്.