താനെ : കേരളത്തിന്റെ തനതും ദൃശ്യസമ്പന്നവുമായ ക്ലാസിക്കൽ കലാരൂപമായ കഥകളിയെ നെഞ്ചേറ്റാനും വരുംതലമുറയ്ക്കായി നിലനിർത്താനുമായി ഡോംബിവ്‌ലി കേരളീയ സമാജം കഥകളി ക്ലാസുകൾ ആരംഭിക്കുന്നു. കുട്ടികൾക്കും മുതിർന്നവർക്കും ഒരുപോലെ ഈ സുവർണ്ണാവസരം പ്രയോജനപ്പെടുത്താം. പൈതൃകവും അച്ചടക്കവും ഭാവപ്രകടനങ്ങളും കഥാഖ്യാനവും സമന്വയിക്കുന്ന കഥകളിയുടെ ലോകത്തേക്ക് കലാസ്വാദകരെ സമാജം സ്വാഗതം ചെയ്യുന്നു.

കഥകളി എന്ന മഹത്തായ കലാരൂപത്തെ അടുത്തറിയാനും അഭ്യസിക്കാനും ആഗ്രഹിക്കുന്ന തുടക്കക്കാർക്കും താല്പര്യമുള്ളവർക്കുമായാണ് ക്ലാസുകൾ ക്രമീകരിച്ചിരിക്കുന്നത്. ആഴ്ചയിൽ ഒരു ദിവസം എന്ന രീതിയിലാണ് ക്ലാസുകൾ നടക്കുക. കുറഞ്ഞത് 10 വിദ്യാർത്ഥികളെങ്കിലും ഉണ്ടെങ്കിൽ മാത്രമേ ക്ലാസുകൾ ആരംഭിക്കുകയുള്ളൂ.

ഫീസ് ഘടനയും സമയക്രമവും

സമാജം അംഗങ്ങൾക്കും അവരുടെ മക്കൾക്കും പ്രതിമാസം 700 രൂപയും, സമാജത്തിൽ അംഗത്വമില്ലാത്തവർക്ക് പ്രതിമാസം 1000 രൂപയുമാണ് ഫീസ്. 2026 ജൂലൈ മാസം മുതൽ ക്ലാസുകൾ ആരംഭിക്കാനാണ് നിശ്ചയിച്ചിരിക്കുന്നത്. എല്ലാ ശനിയാഴ്ചകളിലും വൈകുന്നേരം 6 മണിക്ക് താക്കൂർലിയിലെ ഖംഭാൽപാഡയിലുള്ള മോഡൽ കോളേജിൽ വെച്ചായിരിക്കും ക്ലാസുകൾ നടക്കുക.

കൂടുതൽ വിവരങ്ങൾക്ക് ബന്ധപ്പെടുക

Ph : +91 98208 86717