മുംബൈ:ഉപ മുഖ്യമന്ത്രി ഏക്നാഥ് ഷിൻഡെയുടെ നേതൃത്വത്തിലുള്ള ശിവസേനാ വിഭാഗം മുംബൈയിൽ പുതിയ പാർട്ടി ആസ്ഥാനം നിർമ്മിക്കാനൊരുങ്ങുന്നു. ഉദ്ദവ് താക്കറെയുടെ വസതിയായ ‘മാതോശ്രീ’ക്ക് തൊട്ടടുത്തായി ബാന്ദ്ര ഈസ്റ്റിലാണ് മൂന്ന് നിലകളുള്ള പുതിയ ‘ശിവസേനാ ഭവൻ’ ഉയരുക. തിരഞ്ഞെടുപ്പ് കമ്മീഷൻ ഔദ്യോഗികമായി പാർട്ടി പേരും ചിഹ്നവും അനുവദിച്ചതിന് പിന്നാലെയാണ് ഷിൻഡെ വിഭാഗത്തിന്റെ ഈ നീക്കം.
ദാദറിലുള്ള പരമ്പരാഗത ശിവസേനാ ഭവൻ നിലവിൽ ഉദ്ദവ് താക്കറെ വിഭാഗത്തിന്റെ നിയന്ത്രണത്തിലാണ്. ഈ സാഹചര്യത്തിലാണ് മുംബൈയിൽ തങ്ങൾക്കും ശക്തമായ ഒരു കേന്ദ്രം വേണമെന്ന ലക്ഷ്യത്തോടെ ഷിൻഡെ വിഭാഗം പുതിയ ആസ്ഥാനം പണിയുന്നത്. പുതിയ കെട്ടിടത്തിന് ദാദറിലെ ഭവന്റെ അതേ രൂപമായിരിക്കില്ല എന്ന് എം.എൽ.എ സദാനന്ദ് സർവങ്കർ വ്യക്തമാക്കി. പാർട്ടി പ്രവർത്തകർക്കായി മുംബൈയുടെ മധ്യഭാഗത്ത് ഒരു കേന്ദ്രം ആവശ്യമാണെന്നും, ഈ ഓഫീസ് കോർപ്പറേറ്റ് ലുക്കിലായിരിക്കുമെന്നും നേതാവ് കിരൺ പാവ്സ്കർ പറഞ്ഞു.
അതേസമയം, ദാദറിലെ യഥാർത്ഥ ശിവസേനാ ഭവന്റെ പ്രാധാന്യം കുറയ്ക്കാനാണ് ഷിൻഡെ വിഭാഗം ശ്രമിക്കുന്നതെന്ന് താക്കറെ പക്ഷത്തെ നേതാവ് ആനന്ദ് ദുബെ ആരോപിച്ചു. വരാനിരിക്കുന്ന ബി.എം.സി തിരഞ്ഞെടുപ്പിന് മുന്നോടിയായി സ്വാധീനം ഉറപ്പിക്കാനുള്ള ഷിൻഡെ വിഭാഗത്തിന്റെ ഈ പുതിയ കെട്ടിടത്തിന്റെ അന്തിമ പ്ലാൻ മുഖ്യമന്ത്രി ഏക്നാഥ് ഷിൻഡെ ഉടൻ പ്രഖ്യാപിക്കും.
