മുംബൈ: പൊതുനിരത്തിൽ ഹെൽമറ്റ് പോലുമില്ലാതെ സ്കൂട്ടറിൽ പ്രായപൂർത്തിയാകാത്ത നാല് കുട്ടികളുടെ അത്യന്തം അപകടകരമായ അഭ്യാസപ്രകടനവും മരണപ്പാച്ചിലും. ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ കടുത്ത നടപടിയുമായി മുംബൈ കല്യാൺ ട്രാഫിക് പൊലീസ് രംഗത്തെത്തി. പ്രായപൂർത്തിയാകാത്ത കുട്ടികൾക്ക് വാഹനം നൽകിയതിനും ട്രാഫിക് നിയമങ്ങൾ ലംഘിച്ചതിനും സ്കൂട്ടറിന്റെ ഉടമസ്ഥന് 23,500 രൂപ പിഴ ചുമത്തുകയും വാഹനം കസ്റ്റഡിയിലെടുക്കുകയും ചെയ്തു.  

പൊതുനിരത്തിലൂടെ അതിവേഗത്തിൽ പായുന്ന സ്കൂട്ടറിന്റെ മുകളിൽ ഇരുന്ന് കുട്ടികൾ അഭ്യാസപ്രകടനങ്ങൾ നടത്തുന്ന വീഡിയോ ഓൺലൈനിൽ വ്യാപകമായി പ്രചരിച്ചിരുന്നു. റോഡ് സുരക്ഷയ്ക്ക് കടുത്ത ഭീഷണിയുയർത്തിയ ഈ ദൃശ്യങ്ങൾ ശ്രദ്ധയിൽപ്പെട്ടയുടൻ തന്നെ ട്രാഫിക് വിഭാഗം അന്വേഷണം ആരംഭിക്കുകയായിരുന്നു. തുടർന്ന് നടത്തിയ അന്വേഷണത്തിലാണ് സ്കൂട്ടർ ഓടിച്ചിരുന്നത് വെറും 13 വയസ്സ് മാത്രം പ്രായമുള്ള ആൺകുട്ടിയാണെന്ന് പൊലീസ് കണ്ടെത്തിയത്. ബെതുർകാർപാഡ സ്വദേശിയായ ശ്രീറാം റാത്തോഡ് എന്നയാളുടെ പക്കൽ നിന്നാണ് പൊലീസ് വാഹനം പിടിച്ചെടുത്തത്. 

വീട്ടുകാരുടെ അറിവോ സമ്മതമോ കൂടാതെയാണ് കുട്ടി സ്കൂട്ടറുമായി തെരുവിലിറങ്ങിയതെന്നാണ് വിവരം. മുത്തശ്ശൻ അറിയാതെ വീട്ടിൽ നിന്നും സ്കൂട്ടറിന്റെ താക്കോൽ കൈക്കലാക്കിയ പേരക്കുട്ടി മറ്റ് മൂന്ന് കൂട്ടുകാരെയും കൂട്ടി അഭ്യാസപ്രകടനത്തിന് മുതിരുകയായിരുന്നുവെന്ന് ചോദ്യം ചെയ്യലിൽ മുത്തശ്ശൻ പൊലീസിനോട് വ്യക്തമാക്കി. ലൈസൻസില്ലാതെ പ്രായപൂർത്തിയാകാത്ത കുട്ടി വാഹനം ഓടിക്കൽ, അശ്രദ്ധമായും അപകടകരമായും വാഹനം ഓടിക്കൽ, ഹെൽമറ്റ് ധരിക്കാതിരിക്കൽ, സ്കൂട്ടറിൽ പരിധിയിൽ കൂടുതൽ ആളുകളെ കയറ്റൽ, ഇൻഷുറൻസ് ഇല്ലാതിരിക്കൽ തുടങ്ങിയ മോട്ടോർ വാഹന വകുപ്പിലെ വിവിധ നിയമലംഘനങ്ങൾ ചുമത്തിയാണ് ഭീമമായ തുക പിഴ ഈടാക്കിയത്. കേസ് തുടർനടപടികൾക്കായി കോടതിക്ക് കൈമാറിയിട്ടുണ്ട്.

അതേസമയം, കേസിന്റെ അന്വേഷണത്തിനിടയിൽ മോട്ടോർ വാഹന വകുപ്പിനെപ്പോലും ഞെട്ടിക്കുന്ന മറ്റൊരു വിവരവും പൊലീസിന് ലഭിച്ചു. കഴിഞ്ഞ കുറച്ചു വർഷങ്ങൾക്കിടയിൽ ഈ സ്കൂട്ടർ ഡീലർമാരും വ്യക്തികളും ഉൾപ്പെടെ ആറോളം പേരുടെ കൈ മറിഞ്ഞാണ് നിലവിലെ ഉടമസ്ഥനിലേക്ക് എത്തിയത്. എന്നാൽ ആർടിഒ (RTO) രേഖകളിൽ ഇതൊന്നും കൃത്യമായി അപ്ഡേറ്റ് ചെയ്തിരുന്നില്ല. വാഹനം വാങ്ങിയവരാരും തന്നെ ഉടമസ്ഥാവകാശം ഔദ്യോഗികമായി മാറ്റിയിരുന്നില്ലെന്ന് ട്രാഫിക് ഇൻസ്പെക്ടർ മിലിന്ദ് ജോഗ്ഗെ അറിയിച്ചു. രേഖകളിലെ ഈ കൃത്രിമത്വം കേസ് അന്വേഷണം കൂടുതൽ സങ്കീർണ്ണമാക്കിയിട്ടുണ്ട്.

വാഹനങ്ങൾ വാങ്ങുമ്പോഴും വിൽക്കുമ്പോഴും ഉടമസ്ഥാവകാശം മാറ്റേണ്ടതിന്റെ പ്രാധാന്യമാണ് ഈ സംഭവം വ്യക്തമാക്കുന്നതെന്ന് പൊലീസ് ഉദ്യോഗസ്ഥർ ഓർമ്മിപ്പിച്ചു. കുട്ടികൾക്ക് വാഹനങ്ങൾ ഓടിക്കാൻ നൽകുന്ന മാതാപിതാക്കളും രക്ഷിതാക്കളും കടുത്ത നിയമനടപടികൾ നേരിടേണ്ടി വരുമെന്ന് ട്രാഫിക് വിഭാഗം കർശന മുന്നറിയിപ്പ് നൽകി. കല്യാൺ ട്രാഫിക് പൊലീസ് അസിസ്റ്റന്റ് കമ്മീഷണർ കിരൺ ബൽവാദ്കറുടെ മേൽനോട്ടത്തിലായിരുന്നു ഈ ശക്തമായ നടപടി.