താനെ: മഹാനഗരത്തെ ഹരിതാഭമാക്കാൻ വൻ പദ്ധതിയുമായി താനെ മുൻസിപ്പൽ കോർപ്പറേഷൻ (ടിഎംസി). പരിസ്ഥിതി ദിനത്തോടനുബന്ധിച്ച് നഗരത്തിൽ ഒരു ലക്ഷം വൃക്ഷത്തൈകൾ നട്ടുപിടിപ്പിക്കാനുള്ള ബൃഹദ് പദ്ധതിക്ക് കോർപ്പറേഷൻ തുടക്കമിട്ടു. പാട്ലിപാഡ ബയോഡൈവേഴ്സിറ്റി പാർക്കിൽ (ബാംബൂ വൻ) ഇരുനൂറോളം മുളന്തൈകൾ നട്ടുകൊണ്ട് താനെ മുൻസിപ്പൽ കമ്മീഷണർ സൗരഭ് റാവു പദ്ധതിയുടെ ഔദ്യോഗിക ഉദ്ഘാടനം നിർവഹിച്ചു. നടപ്പു സാമ്പത്തിക വർഷത്തിനുള്ളിൽ ലക്ഷ്യം പൂർത്തിയാക്കാനാണ് നഗരസഭയുടെ തീരുമാനം.
പാരിസ്ഥിതികമായി ഏറെ ഗുണങ്ങളുള്ളതും വേഗത്തിൽ വളരുന്നതുമായ പ്രത്യേക ഇനം മുളന്തൈകളാണ് പദ്ധതിക്കായി തിരഞ്ഞെടുത്തത്. അന്തരീക്ഷത്തിലെ ഹരിതഗൃഹ വാതകങ്ങളെ വൻതോതിൽ ആഗിരണം ചെയ്യാനും, നഗരങ്ങളിലെ വായു-ശബ്ദ മലിനീകരണങ്ങൾ തടയാനും ഇവയ്ക്ക് പ്രത്യേക കഴിവുണ്ടെന്ന് വിദഗ്ധർ ചൂണ്ടിക്കാട്ടുന്നു. പൊതുസ്ഥലങ്ങൾ, പാർക്കുകൾ, റോഡരികുകൾ, സർക്കാർ സ്ഥാപനങ്ങൾ എന്നിവ കേന്ദ്രീകരിച്ച് ജനപങ്കാളിത്തത്തോടെയാണ് ഒരു ലക്ഷം മരങ്ങൾ വെച്ചുപിടിപ്പിക്കുന്ന ഈ ഹരിതദൗത്യം പൂർത്തിയാക്കുക.
വൃക്ഷത്തൈ നടീലിനൊപ്പം കോർപ്പറേഷന്റെ കീഴിലുള്ള ജൈവകൃഷി (ഓർഗാനിക് ഫാമിംഗ്) പദ്ധതിയുടെ പുരോഗതിയും കമ്മീഷണർ വിലയിരുത്തി. പച്ചക്കറികളും പഴവർഗ്ഗങ്ങളും പൂർണ്ണമായും ജൈവരീതിയിൽ ഉൽപ്പാദിപ്പിക്കുന്ന ഈ തോട്ടത്തിലെ വിളവുകൾ അനാഥാലയങ്ങൾക്കും പ്രകൃതിസ്നേഹികൾക്കുമാണ് സൗജന്യമായി വിതരണം ചെയ്യുന്നത്. കൂടാതെ, പൊതുജനങ്ങൾക്ക് സൗജന്യമായി ജൈവകൃഷി പരിശീലനവും വിത്തുസംരക്ഷണ മാർഗ്ഗങ്ങളും പകർന്നുനൽകുന്ന മികച്ചൊരു വിദ്യാഭ്യാസ കേന്ദ്രം കൂടിയായി ഈ പദ്ധതി മാറിയിട്ടുണ്ടെന്ന് അധികൃതർ വ്യക്തമാക്കി. നഗരത്തിന്റെ ജൈവവൈവിധ്യം വീണ്ടെടുക്കാൻ ഓരോ പൗരനും മുന്നോട്ടുവരണമെന്ന് കോർപ്പറേഷൻ അഭ്യർത്ഥിച്ചു.
