മുംബൈ:ഭക്ഷണസാധനങ്ങളിൽ മായം ചേർക്കൽ മാഫിയക്കെതിരെ മുംബൈയിൽ കടുത്ത നടപടിയുമായി ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA). നഗരത്തിൽ മൂന്ന് ദിവസങ്ങളിലായി നടത്തിയ മിന്നൽ പരിശോധനകളിൽ ഭക്ഷണസാധനങ്ങളിൽ മാരകമായ രീതിയിൽ മായം ചേർത്ത 19 പേരെ അധികൃതർ അറസ്റ്റ് ചെയ്തു. ഇതോടൊപ്പം ഗുരുതരമായ ചട്ടലംഘനങ്ങൾ കണ്ടെത്തിയ 19 പ്രമുഖ ഭക്ഷ്യോത്പാദന-വിതരണ സ്ഥാപനങ്ങൾ എഫ്ഡിഎ പൂട്ടി സീൽ വെക്കുകയും ചെയ്തു.
മുംബൈയിലെ വിവിധ ഹോട്ടലുകൾ, മധുരപലഹാര നിർമ്മാണ കേന്ദ്രങ്ങൾ, ബേക്കറികൾ, എണ്ണ ശുദ്ധീകരണ ശാലകൾ എന്നിവ കേന്ദ്രീകരിച്ചായിരുന്നു എഫ്ഡിഎ ഉദ്യോഗസ്ഥരുടെ അപ്രതീക്ഷിത റെയ്ഡ്. ഉപയോഗശൂന്യമായതും ഗുണനിലവാരമില്ലാത്തതുമായ അസംസ്കൃത വസ്തുക്കൾ ഉപയോഗിച്ച് ആഹാരസാധനങ്ങൾ നിർമ്മിച്ചതും, വൃത്തിഹീനമായ അന്തരീക്ഷത്തിൽ ഭക്ഷണം കൈകാര്യം ചെയ്തതുമാണ് ഈ സ്ഥാപനങ്ങൾക്കെതിരെ ഉടനടി നടപടിയെടുക്കാൻ കാരണം. പിടിച്ചെടുത്ത നിരവധി ഭക്ഷണസാമ്പിളുകൾ ലബോറട്ടറി പരിശോധനയ്ക്കായി അയച്ചിട്ടുണ്ട്. ഇതിന്റെ ഫലം വരുന്നതോടെ കൂടുതൽ കടുത്ത നടപടികൾ ഉണ്ടാകുമെന്നാണ് സൂചന.
മുംബൈയിലെ താനെ, നവി മുംബൈ ഉൾപ്പെടെയുള്ള നഗരപ്രദേശങ്ങളിലെ ജനങ്ങളുടെ ജീവന് ഭീഷണിയാകും വിധം പ്രവർത്തിച്ചിരുന്ന വൻ മായക്കൂട്ടുകളാണ് ഈ മൂന്ന് ദിവസത്തെ പ്രത്യേക പരിശോധനയിലൂടെ വെളിച്ചത്തായത്. വരും ദിവസങ്ങളിലും പരിശോധന കർശനമായി തുടരുമെന്നും ഹോട്ടലുകളിലും ഭക്ഷ്യോത്പാദന കേന്ദ്രങ്ങളിലും യാതൊരുവിധ വിട്ടുവീഴ്ചയും അനുവദിക്കില്ലെന്നും എഫ്ഡിഎ ഉദ്യോഗസ്ഥർ വ്യക്തമാക്കി. ലൈസൻസില്ലാതെ പ്രവർത്തിക്കുന്ന സ്ഥാപനങ്ങൾക്കെതിരെയും കൃത്രിമ നിറങ്ങളും രാസവസ്തുക്കളും ചേർക്കുന്നവർക്കെതിരെയും ശക്തമായ നിയമനടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.
