മുംബൈ: മുംബൈ ബാന്ദ്രയിൽ കോർപ്പറേഷന്റെ കയ്യേറ്റമൊഴിപ്പിക്കൽ നടപടികൾക്കിടെ വൻ സംഘർഷം. ഉദ്യോഗസ്ഥർക്കും പോലീസിനും നേരെ ഉണ്ടായ അതിരൂക്ഷമായ കല്ലേറിനെത്തുടർന്ന് നിർമ്മാണ പ്രവർത്തനങ്ങൾ തടസ്സപ്പെടുകയും പ്രദേശത്ത് സംഘർഷാവസ്ഥ ഉടലെടുക്കുകയും ചെയ്തു. സംഭവവുമായി ബന്ധപ്പെട്ട് സ്ത്രീകളുൾപ്പെടെ 16 പേരെ മുംബൈ പോലീസ് അറസ്റ്റ് ചെയ്തു. ഇവർക്കെതിരെ വധശ്രമം ഉൾപ്പെടെയുള്ള ഗുരുതരമായ വകുപ്പുകൾ ചുമത്തിയാണ് കേസെടുത്തിരിക്കുന്നത്.

ബാന്ദ്ര വെസ്റ്റിലെ ശാസ്ത്രി നഗർ ചേരി പ്രദേശത്തായിരുന്നു ബിഎംസി (ബൃഹൻമുംബൈ മുൻസിപ്പൽ കോർപ്പറേഷൻ) അധികൃതർ കയ്യേറ്റമൊഴിപ്പിക്കലിനായി എത്തിയത്. പ്രദേശത്തെ അനധികൃത നിർമ്മാണങ്ങൾ പൊളിച്ചുനീക്കുന്നതിനിടയിൽ, പ്രകോപിതരായ ഒരു കൂട്ടം ആളുകൾ ഉദ്യോഗസ്ഥർക്കും സുരക്ഷയൊരുക്കാൻ എത്തിയ പോലീസ് ഉദ്യോഗസ്ഥർക്കും നേരെ കല്ലെറിയുകയായിരുന്നു. ഇതോടെ സ്ഥിതിഗതികൾ നിയന്ത്രണാതീതമായി.

​ആക്രമണത്തിൽ കോർപ്പറേഷൻ ജീവനക്കാർക്കും പോലീസ് ഉദ്യോഗസ്ഥർക്കും പരിക്കേറ്റിട്ടുണ്ട്. പോലീസിന്റെ ഔദ്യോഗിക വാഹനങ്ങൾക്കും കോർപ്പറേഷന്റെ ജെസിബി യന്ത്രങ്ങൾക്കും കല്ലേറിൽ വ്യാപകമായ കേടുപാടുകൾ സംഭവിച്ചു. തുടർന്ന് കൂടുതൽ പോലീസ് സന്നാഹം സ്ഥലത്തെത്തിയാണ് രംഗം ശാന്തമാക്കിയത്. ഡ്യൂട്ടിയിലുണ്ടായിരുന്ന സർക്കാർ ഉദ്യോഗസ്ഥരെ മാരകായുധങ്ങൾ ഉപയോഗിച്ച് വധിക്കാൻ ശ്രമിച്ചു എന്ന കുറ്റത്തിനാണ് പിടിയിലായവർക്കെതിരെ നിർമ്മൽ നഗർ പോലീസ് കേസ് രജിസ്റ്റർ ചെയ്തിരിക്കുന്നത്.

സംഘർഷത്തിൽ പങ്കെടുത്ത മറ്റുള്ളവർക്കായി പോലീസ് തിരച്ചിൽ ശക്തമാക്കിയിട്ടുണ്ട്. പ്രദേശത്തെ സിസിടിവി ദൃശ്യങ്ങളും മൊബൈൽ വീഡിയോകളും പരിശോധിച്ച് അക്രമികളെ തിരിച്ചറിയാനുള്ള ശ്രമത്തിലാണ് അന്വേഷണസംഘം. സംഘർഷ സാധ്യത കണക്കിലെടുത്ത് ബാന്ദ്രയിലെ ശാസ്ത്രി നഗർ പരിസരത്ത് നിലവിൽ വൻ പോലീസ് കാവൽ ഏർപ്പെടുത്തിയിട്ടുണ്ട്.