മുംബൈ: നവി മുംബൈയുടെ പ്രധാന കുടിവെള്ള സ്രോതസ്സായ മോർബേ ഡാമിൽ ഉപയോഗയോഗ്യമായ ജലശേഖരം 27 ശതമാനമായി കുറഞ്ഞതായി നവി മുംബൈ മുനിസിപ്പൽ കോർപറേഷൻ (എൻഎംഎംസി) മുന്നറിയിപ്പ് നൽകി. നിലവിലെ സാഹചര്യത്തിൽ വരുംദിവസങ്ങളിൽ ജലക്ഷാമം രൂക്ഷമാകാനുള്ള സാധ്യത ഉയർന്നതായി അധികൃതർ അറിയിച്ചു.

കഴിഞ്ഞ 25 വർഷമായി അണക്കെട്ടിൽ ഡീസിൽട്ടിംഗ് (മണ്ണ് നീക്കം) നടത്താത്തത് ജലസംഭരണ ശേഷിയെ ഗണ്യമായി കുറച്ചതായി വിലയിരുത്തൽ. അടിഞ്ഞുകൂടിയ മണ്ണ് കാരണം സംഭരണ ശേഷി കുറഞ്ഞതോടെ ഉപയോഗയോഗ്യമായ വെള്ളത്തിന്റെ അളവ് വേഗത്തിൽ ഇടിഞ്ഞുവെന്നതാണ് റിപ്പോർട്ട്.

സാഹചര്യം ഗുരുതരമാണെന്നതിനാൽ ജലോപയോഗത്തിൽ കർശന നിയന്ത്രണം പാലിക്കണമെന്ന് എൻഎംഎംസി ജനങ്ങളോട് അഭ്യർഥിച്ചു. അനാവശ്യ ഉപയോഗം ഒഴിവാക്കാനും ജലം സംരക്ഷിക്കാനും നിർദേശം നൽകിയിട്ടുണ്ട്. ആവശ്യമായാൽ ജലവിതരണത്തിൽ നിയന്ത്രണങ്ങൾ ഏർപ്പെടുത്തേണ്ടിവരുമെന്ന മുന്നറിയിപ്പും പുറപ്പെടുവിച്ചു.

മൺസൂൺ വരുന്നതുവരെ ജലനിലയിൽ ഗണ്യമായ ഉയർച്ച പ്രതീക്ഷിക്കാനാകില്ലെന്ന് വിലയിരുത്തപ്പെടുന്നതിനാൽ, പൊതുജനങ്ങളുടെ ജാഗ്രതയും സഹകരണവും അനിവാര്യമാണെന്ന് അധികൃതർ വ്യക്തമാക്കി.