മുംബൈ: കടുത്ത വേനൽച്ചൂട് നഗരജീവിതത്തെ ബാധിച്ചിരിക്കുന്ന സാഹചര്യത്തിൽ ആരോഗ്യസംരക്ഷണത്തിനും ജലാംശം നിലനിർത്തുന്നതിനായി ലളിതമായ ഭക്ഷണശീലങ്ങൾ അനിവാര്യമാണെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു. ഉയർന്ന താപനില ശരീരത്തിൽ ക്ഷീണം വർധിപ്പിക്കുന്നതിനാൽ ദിനചര്യയിൽ ചെറിയ മാറ്റങ്ങൾ പോലും വലിയ ഗുണം ചെയ്യുമെന്നാണ് നിർദ്ദേശം.
ദിവസം മുഴുവൻ ആവശ്യത്തിന് വെള്ളം കുടിക്കുന്നത് ഏറ്റവും പ്രധാനമാണ്. കൂടാതെ, ഇളനീർ, സംഭാരം നാരങ്ങ വെള്ളം പോലുള്ള സ്വാഭാവിക പാനീയങ്ങൾ ഉൾപ്പെടുത്തുന്നത് ശരീരത്തിന് ആവശ്യമായ ഇലക്ട്രോലൈറ്റ് നിലനിർത്താൻ സഹായിക്കും.
ഭക്ഷണക്രമത്തിൽ ലളിതവും തണുപ്പ് നൽകുന്നതുമായ വിഭവങ്ങൾ ഉൾപ്പെടുത്തണമെന്നും വിദഗ്ധർ പറയുന്നു. പഴങ്ങൾ, പച്ചക്കറികൾ, ജലാംശം കൂടുതലുള്ള ഭക്ഷണങ്ങൾ എന്നിവ ചൂടിനെ ചെറുക്കാൻ സഹായകരമാണ്. അതേസമയം, അത്യധികം മസാലയുള്ളതും എണ്ണയേറിയതുമായ ഭക്ഷണങ്ങൾ ഒഴിവാക്കുന്നതാണ് നല്ലത്.
വേനൽക്കാലത്ത് ചെറിയ ഇടവേളകളിൽ ഭക്ഷണം കഴിക്കുന്ന ശീലം സ്വീകരിക്കണമെന്നും, ശരീരത്തിന് ഭാരം കൂടാതെയുള്ള പോഷകാഹാരം തിരഞ്ഞെടുക്കണമെന്നും നിർദേശം. പുറത്തുപോകുമ്പോൾ സൂര്യാഘാതം ഒഴിവാക്കാൻ മുൻകരുതലുകളും അനിവാര്യമാണ്.
ചൂട് ശക്തമാകുന്ന സാഹചര്യത്തിൽ ആരോഗ്യസംരക്ഷണത്തിൽ അവഗണന അപകടകരമാകാമെന്ന് വിദഗ്ധർ ചൂണ്ടിക്കാട്ടുന്നു. ലളിതമായ ജീവിതശൈലി മാറ്റങ്ങളിലൂടെ തന്നെ വേനലിനെ സുരക്ഷിതമായി അതിജീവിക്കാനാകുമെന്ന് അവർ കൂട്ടിച്ചേർക്കുന്നു.
