മുംബൈ: ഉപമുഖ്യമന്ത്രി എക്നാഥ് ഷിൻഡെയുടെ ഡൽഹി സന്ദർശനത്തെ പരിഹസിച്ച് ശിവസേന (യുബിടി) നേതാവ് സഞ്ജയ് റൗത്ത്. ശിന്ദെയുടെ പാർട്ടിയുടെ യഥാർത്ഥ നേതൃത്വം മുംബൈയിൽ അല്ല, ഡൽഹിയിലാണെന്നായിരുന്നു റൗത്തിന്റെ വിമർശനം.
ശിവസേന എന്ന പേരിൽ പ്രവർത്തിച്ചാലും പ്രധാന തീരുമാനങ്ങൾ എല്ലാം കേന്ദ്രനേതൃത്വത്തിന്റെ അനുമതിയോടെയാണെന്ന് റൗത്ത് ആരോപിച്ചു. മഹാരാഷ്ട്രയിലെ വിഷയങ്ങൾ പോലും തീരുമാനിക്കാൻ ഷിൻഡെ ഡൽഹിയിലെത്തി കേന്ദ്ര ആഭ്യന്തര മന്ത്രി അമിത് ഷായുമായി കൂടിക്കാഴ്ച നടത്തേണ്ടിവരുന്ന സാഹചര്യമാണെന്നും അദ്ദേഹം പറഞ്ഞു.
ഇതിനിടെ, ശിന്ദെയുടെ ഡൽഹി യാത്രയുടെ വ്യക്തമായ ലക്ഷ്യം പുറത്തുവന്നിട്ടില്ല. പാർലമെന്റിലെ ബജറ്റ് സമ്മേളനത്തിനിടെ ശിവസേന എംപിമാരുമായി കൂടിക്കാഴ്ച നടത്താനാണ് അദ്ദേഹം എത്തിയതെന്ന സൂചനകളാണ് ലഭിക്കുന്നത്.
റൗത്തിന്റെ പരാമർശം മഹാരാഷ്ട്ര രാഷ്ട്രീയത്തിൽ വീണ്ടും ചർച്ചകൾക്ക് വഴി തെളിച്ചു. ശിവസേന വിഭജനത്തിന് പിന്നാലെ തുടരുന്ന രാഷ്ട്രീയ തർക്കം ഇതോടെ കൂടുതൽ ശക്തമാകുന്നതായി നിരീക്ഷണം.
