മുംബൈ: രാജ്യത്ത് രൂപപ്പെട്ട എൽപിജി ക്ഷാമത്തെ തുടർന്ന് ട്രെയിനുകളിലെ ഭക്ഷണസേവനം തടസപ്പെടാതിരിക്കാനായി കേന്ദ്ര സർക്കാർ പ്രത്യേക നടപടി സ്വീകരിച്ചു. റെയിൽവേ അടുക്കളകൾക്കും കാറ്ററിംഗ് യൂണിറ്റുകൾക്കും കമ്മർഷ്യൽ എൽപിജി സിലിണ്ടറുകൾ മുൻഗണന അടിസ്ഥാനത്തിൽ നൽകാൻ സംസ്ഥാന ഏജൻസികൾക്ക് കേന്ദ്ര പെട്രോളിയം മന്ത്രാലയം നിർദേശം നൽകി. 

ട്രെയിനുകളിലെ ഭക്ഷണസേവനം തുടർച്ചയായി നിലനിർത്തുക എന്ന ലക്ഷ്യത്തോടെ 19 കിലോഗ്രാം കമ്മർഷ്യൽ എൽപിജി സിലിണ്ടറുകളുടെ വിതരണം മുൻഗണനാ വിഭാഗത്തിൽ ഉൾപ്പെടുത്താനാണ് തീരുമാനം. റെയിൽവേയുടെ ബേസ് കിച്ചനുകളും ക്ലസ്റ്റർ കിച്ചനുകളും ദിവസേന ആയിരക്കണക്കിന് യാത്രക്കാരുടെ ഭക്ഷണം തയ്യാറാക്കുന്നതിനാൽ ഗ്യാസ് ലഭ്യത നിർണായകമാണെന്ന് അധികൃതർ അറിയിച്ചു.

ഇന്ത്യൻ റെയിൽവേയുടെ കാറ്ററിംഗ് സംവിധാനം വഴി രാജ്യത്തുടനീളം പ്രതിദിനം ഏകദേശം 17 ലക്ഷം പേർക്ക് ഭക്ഷണങ്ങൾ  വിതരണം ചെയ്യപ്പെടുന്നു. മുംബൈ ഉൾപ്പെടുന്ന  മേഖലയിലാണ് ഇതിന്റെ വലിയൊരു പങ്ക് ലഭിക്കുന്നത്. അതിനാൽ ഗ്യാസ് ക്ഷാമം തുടരുകയാണെങ്കിൽ ഭക്ഷണവിതരണത്തിൽ വലിയ തടസ്സം ഉണ്ടാകുമെന്ന ആശങ്ക ഉയർന്നിരുന്നു. 

മുംബൈയിലെ സെവ്രി, കുര്ല, ചെമ്പൂർ, മുംബൈ സെൻട്രൽ, ബോരിവലി, പവായ് എന്നിവിടങ്ങളിലെ ക്ലസ്റ്റർ കിച്ചനുകൾ ഉൾപ്പെടെ നിരവധി റെയിൽവേ അടുക്കളകൾ ദിവസേന ആയിരക്കണക്കിന് പേർക്കുള്ള ഭക്ഷണങ്ങൾ തയ്യാറാക്കി ദീർഘദൂര ട്രെയിനുകളിലേക്ക് എത്തിക്കുന്നതാണ്. എൽപിജി വിതരണം ഉറപ്പാക്കിയതോടെ ഈ സേവനങ്ങൾ തടസ്സമില്ലാതെ തുടരാനാകും എന്നാണ് റെയിൽവേ അധികൃതരുടെ പ്രതീക്ഷ. 

എൽപിജി ക്ഷാമം തുടരുന്ന സാഹചര്യത്തിൽ ചില ട്രെയിനുകളിൽ പാക്കറ്റ് ഭക്ഷണവും റെഡി-ടു-ഈറ്റ് ഭക്ഷണവുമാണ് കൂടുതലായി നൽകുന്നത്. എങ്കിലും പുതിയ തീരുമാനം മൂലം യാത്രക്കാർക്ക് ഭക്ഷണം ലഭിക്കുന്ന സംവിധാനം നിലനിർത്താനാകും എന്നാണ് വിലയിരുത്തൽ.