മുംബൈ–ഗോവ ദേശീയപാതയിൽ രത്നഗിരിക്ക് സമീപം സിഎൻജി വാതക ചോർച്ചയുണ്ടായ സംഭവം വലിയ ദുരന്തമായി മാറുന്നതിൽ നിന്ന് ഒഴിവായി. സിഎൻജി നിറച്ച ടാങ്കറിൽ ഉണ്ടായ തകരാറിനെ തുടർന്ന് വാതകം പുറത്തേക്ക് ചോർന്നതാണ് സംഭവം.
വാതക ചോർച്ച ശ്രദ്ധയിൽപ്പെട്ടതോടെ ഡ്രൈവർ അതിവേഗം പ്രതികരിക്കുകയായിരുന്നു.വാഹനം ജനവാസമില്ലാത്ത ഭാഗത്തേക്ക് മാറ്റി നിർത്തി സുരക്ഷിതമായി മാറി. തുടർന്ന് പൊലീസിനും അഗ്നിശമനസേനയ്ക്കും വിവരം അറിയിച്ചു. സ്ഥലത്തെത്തിയ സംഘം ഉടൻ തന്നെ സുരക്ഷാ വളയം ഒരുക്കി ഗതാഗതം നിയന്ത്രിച്ചു.
അതേസമയം തീപിടിത്തമുണ്ടായിരുന്നെങ്കിൽ വലിയ അപകടം സംഭവിക്കാമായിരുന്നു. എന്നാൽ സമയബന്ധിതമായ ഇടപെടലുകൾ മൂലം ആളപായമോ പരിക്കുകളോ ഉണ്ടായില്ലെന്ന് അധികൃതർ വ്യക്തമാക്കി.
സംഭവത്തെ തുടർന്ന് അപകടകാരിയായ ഇന്ധനങ്ങളുടെ ഗതാഗതത്തിൽ കൂടുതൽ ജാഗ്രതയും കർശനമായ പരിശോധനയും വേണമെന്ന ആവശ്യവും ഉയർന്നു. സംഭവത്തെക്കുറിച്ച് അന്വേഷണം തുടരുകയാണ്.
