മുംബൈ : മുംബൈ നഗരത്തിന്റെ ജീവനാഡിയായ ലോക്കൽ ട്രെയിൻ സർവീസുകൾ ദിവസേനയുള്ള യാത്രക്കാർക്ക് കടുത്ത ദുരിതമായി മാറുന്നു. വർഷങ്ങളായി നേരിടുന്ന യാത്രാതടസ്സങ്ങൾക്കും തിക്കും തിരക്കിനും ഒടുവിൽ, ഒക്ടോബർ 26-ന് സെൻട്രൽ റെയിൽവേ ശൃംഖല പൂർണ്ണമായി സ്തംഭിച്ച സംഭവത്തിന് പിന്നാലെ യാത്രക്കാർ ഉത്തരവാദിത്തവും മികച്ച സേവനങ്ങളും ആവശ്യപ്പെട്ട് രംഗത്തെത്തിയിരിക്കുകയാണ്.

ഒക്ടോബർ 26-ന് ഓവർഹെഡ് വയറിലുണ്ടായ തടസ്സവും സിഗ്നലിങ് ഹട്ടിലുണ്ടായ തീപിടിത്തവുമാണ് സെൻട്രൽ റെയിൽവേയുടെ സർവീസുകൾ പൂർണ്ണമായി തകിടംമറിച്ചത്. ആയിരക്കണക്കിന് യാത്രക്കാരാണ് മണിക്കൂറുകളോളം ട്രെയിനുകളിൽ കുടുങ്ങിയത്. പലരും ലക്ഷ്യസ്ഥാനത്ത് എത്തുന്നതിനായി റെയിൽവേ പാളത്തിലൂടെ നടക്കേണ്ടി വന്നു.  അന്ന് തന്നെ പാളത്തിൽ മൂന്ന് പേരെ മരിച്ച നിലയിലും കണ്ടെത്തിയിരുന്നു.

തുടർച്ചയായ വൈകലുകളും കടുത്ത തിരക്കും തങ്ങളുടെ ഔദ്യോഗിക, വ്യക്തിഗത ജീവിതങ്ങളെ ഗുരുതരമായി ബാധിക്കുന്നതായി യാത്രക്കാർ പറഞ്ഞു. മുളുണ്ടിൽ നിന്നും സി.എസ്.എം.ടി.-ലേക്ക് യാത്ര ചെയ്യുന്ന ഒരു ഉദ്യോഗസ്ഥൻ പറയുന്നത്, ട്രെയിൻ വൈകുന്നതിൽ യാതൊരു നിയന്ത്രണവുമില്ലെങ്കിലും യാത്രക്കാർക്ക് ലേറ്റ് മാർക്കും ശമ്പളത്തിൽ നിന്നുള്ള കുറവുമാണ് ഫലമെന്നാണ്. ട്രെയിൻ വൈകിയെത്തുമ്പോൾ ഇൻഡിക്കേറ്ററുകളിൽ തെറ്റായ വിവരങ്ങളാണ് കാണിക്കുന്നതെന്നും കൃത്യമായ അനൗൺസ്‌മെന്റുകൾ ഉണ്ടാകണമെന്നും അദ്ദേഹം ആവശ്യപ്പെടുന്നു. ഭാണ്ടൂപിൽ നിന്നും കറി റോഡിലേക്ക് ദിവസേന യാത്ര ചെയ്യുന്ന രാമകൃഷ്ണനും സമാനമായ യാത്രാപ്രശ്നങ്ങൾ ചൂണ്ടിക്കാണിച്ചു.

കൂടുതൽ എ.സി. ലോക്കലുകളും ട്രെയിനുകൾക്കുള്ളിൽ സി.സി.ടി.വി. ക്യാമറകളും ഏർപ്പെടുത്തണമെന്ന് വിദ്യാർത്ഥിയായ നേഹ ആവശ്യപ്പെട്ടു. അതേസമയം, യാത്രക്കാരുടെ സുരക്ഷയ്ക്കായി ടിക്കറ്റ് പരിശോധന കർശനമാക്കണമെന്നും സ്റ്റേഷനുകളിൽ കൂടുതൽ ജി.ആർ.പി., ആർ.പി.എഫ്. ഉദ്യോഗസ്ഥരെ വിന്യസിക്കണമെന്നും ഒരു മുതിർന്ന പൗരൻ ആവശ്യപ്പെട്ടു. പാളത്തിലൂടെ നടന്ന് ജീവൻ അപകടത്തിലാക്കരുതെന്നും അദ്ദേഹം ഓർമ്മിപ്പിച്ചു.

യാത്രക്കാരുടെ ആശങ്കകളോട് പ്രതികരിച്ച സെൻട്രൽ റെയിൽവേ ചീഫ് പബ്ലിക് റിലേഷൻസ് ഓഫീസർ സ്വപ്നിൽ നില വ്യക്തമാക്കിയിരിക്കുന്നത്, മുംബൈയിലെ സബർബൻ റെയിൽവേ സംവിധാനം വളരെ സങ്കീർണ്ണവും ബൃഹത്തുമാണെന്നാണ്. സെൻട്രൽ റെയിൽവേയുടെ മുംബൈ ഡിവിഷൻ ദിവസേന 1,800-ലധികം ലോക്കൽ ട്രെയിൻ സർവീസുകളാണ് നടത്തുന്നത്. നാല് ലക്ഷത്തിലധികം യാത്രക്കാരാണ് ഇതിലൂടെ ദിവസേന യാത്ര ചെയ്യുന്നത്. 26 വ്യത്യസ്ത ഉത്ഭവ കേന്ദ്രങ്ങളിൽ നിന്നായി സർവീസുകൾ നടത്തുന്ന ഈ ശൃംഖലയ്ക്ക് ദിവസേന കനത്ത അറ്റകുറ്റപ്പണികളും സുരക്ഷാ മുൻകരുതലുകളും ആവശ്യമാണെന്ന് അദ്ദേഹം പറഞ്ഞു.

തുടർച്ചയായ ട്രെയിനുകൾക്കിടയിലെ ഇടവേള മൂന്നോ മൂന്നര മിനിറ്റിൽ താഴെ മാത്രമാണെന്നും സ്വപ്നിൽ നില വ്യക്തമാക്കി. നാലോ അഞ്ചോ മിനിറ്റ് നീളുന്ന ചെറിയ തടസ്സങ്ങൾ ഉണ്ടായാൽ പോലും, തൊട്ടുപിന്നാലെ വരുന്ന ട്രെയിനുകളെ അത് ബാധിക്കുമെന്നതിനാൽ സർവീസുകൾ സാധാരണ നിലയിലാക്കാൻ വലിയ പ്രയാസം നേരിടാറുണ്ടെന്നും അദ്ദേഹം കൂട്ടിച്ചേർത്തു. ഓഫീസുകളുടെ സമയക്രമത്തിൽ മാറ്റം വരുത്താൻ റെയിൽവേ അഭ്യർത്ഥിച്ചെങ്കിലും പല സംഘടനകളിൽ നിന്നും അനുകൂല പ്രതികരണമല്ല ഉണ്ടായതെന്നും അദ്ദേഹം പറഞ്ഞു.

വേഗതയേറിയ ട്രെയിനുകളോ അടിസ്ഥാന സൗകര്യങ്ങളോ മാത്രമല്ല, കൃത്യസമയത്ത് ജോലിസ്ഥലത്ത് എത്താനും, ഭയമില്ലാതെ യാത്ര ചെയ്യാനും, തടസ്സങ്ങൾ ഉണ്ടാകുമ്പോൾ കൃത്യമായ വിവരങ്ങൾ ലഭിക്കാനും, സുരക്ഷിതമായി തിരിച്ചെത്താനുമാണ് മുംബൈയിലെ യാത്രക്കാർ ഇപ്പോൾ ആഗ്രഹിക്കുന്നത്.