മുംബൈ: നവിമുംബൈ അന്താരാഷ്ട്ര വിമാനത്താവളത്തിലേക്കുള്ള (NMIA) യാത്രാ ചെലവ് കുത്തനെ ഉയരുന്നതായി യാത്രക്കാരുടെ പരാതി. വിമാന ടിക്കറ്റിനേക്കാൾ പോലും വിമാനത്താവളത്തിലേക്കുള്ള യാത്ര ചിലപ്പോൾ കൂടുതൽ ചെലവേറിയതായി മാറുന്നുവെന്നാണ് ആരോപണം.
സോഷ്യൽ മീഡിയയിൽ വൈറലായ ഒരു പോസ്റ്റിൽ, നവിമുംബൈയിൽ നിന്ന് ആന്ധേരി വരെ എത്താൻ ₹3000 വരെ കാബ് ചാർജ് ഈടാക്കിയതായി ഒരു യാത്രക്കാരൻ വ്യക്തമാക്കിയിട്ടുണ്ട്. ഇതോടെ “വിമാനയാത്രക്കാൾ വിമാനത്താവളത്തിലേക്കുള്ള യാത്ര ചെലവേറിയതാകുന്നോ?” എന്ന ചോദ്യവും ഉയർന്നു.
പൊതു ഗതാഗത സൗകര്യങ്ങളുടെ അഭാവമാണ് പ്രധാന പ്രശ്നമെന്ന് യാത്രക്കാർ ചൂണ്ടിക്കാട്ടുന്നു. കാബ് ലഭ്യത കുറവും ഉയർന്ന നിരക്കുകളും യാത്രയെ കൂടുതൽ ബുദ്ധിമുട്ടാക്കുന്നതായും പരാതിയുണ്ട്.
ഇതിനിടെ, വിമാന സർവീസുകൾ വർധിപ്പിക്കാനുള്ള പദ്ധതികൾ മുന്നോട്ട് പോകുമ്പോഴും, യാത്രാസൗകര്യ പ്രശ്നങ്ങൾ പരിഹരിക്കാതെ മുന്നേറുന്നത് വലിയ വെല്ലുവിളിയാകുമെന്ന് മുന്നറിയിപ്പുണ്ട്.
