മുംബൈ: നവി മുംബൈയിൽ ലഹരിമരുന്ന് മാഫിയക്കെതിരെ ശക്തമായ നീക്കങ്ങളുമായി പോലീസ്. കഴിഞ്ഞ നാല് വർഷത്തിനിടെ നടത്തിയ വ്യാപക പരിശോധനകളിൽ ഏകദേശം 136 കോടി രൂപ വിലമതിക്കുന്ന മയക്കുമരുന്നുകൾ പിടികൂടിയതായി അധികൃതർ അറിയിച്ചു.

ഈ കാലയളവിൽ 1,993 എൻഡിപിഎസ് കേസുകൾ രജിസ്റ്റർ ചെയ്തതോടൊപ്പം 2,396 പ്രതികളെ അറസ്റ്റ് ചെയ്തിട്ടുണ്ട്. പ്രാദേശിക ഇടപാടുകളോടൊപ്പം അന്തർസംസ്ഥാനവും അന്താരാഷ്ട്രവുമായ ബന്ധമുള്ള ലഹരി മാഫിയ സംഘം പ്രവർത്തനങ്ങളും പോലീസ് ലക്ഷ്യമിട്ടതായി വ്യക്തമാക്കുന്നു.

“നശാ മുക്ത് നവി മുംബൈ” ക്യാമ്പെയ്‌നിന്റെ ഭാഗമായി ഓപ്പറേഷൻ ഗരുഡ, ഓപ്പറേഷൻ പ്രഹാർ തുടങ്ങിയ പ്രത്യേക നടപടികൾ നടപ്പാക്കി. ഒരേസമയം നിരവധി സ്ഥലങ്ങളിൽ നടത്തിയ റെയ്ഡുകളിൽ കൊക്കെയ്ൻ, മെഫെഡ്രോൺ, ഹെറോയിൻ ഉൾപ്പെടെയുള്ള ലഹരിവസ്തുക്കൾ വൻതോതിൽ പിടിച്ചെടുത്തു.

അന്വേഷണത്തിൽ അന്താരാഷ്ട്ര ബന്ധങ്ങൾ തെളിഞ്ഞതോടെ വിദേശ പൗരന്മാരെ നാടുകടത്തുകയും, അനധികൃത താമസവുമായി ബന്ധപ്പെട്ട് നിരവധി പേരെ ബ്ലാക്ക്‌ലിസ്റ്റ് ചെയ്യുകയും ചെയ്തു.

ലഹരിവിപണിയെ പൂര്‍ണമായും നിയന്ത്രണ വിധേയമാക്കുക എന്ന ലക്ഷ്യത്തോടെ കർശന നടപടികൾ തുടരുമെന്ന് പോലീസ് അറിയിച്ചു. പ്രാദേശിക വിതരണ ശൃംഖലകൾ മുതൽ അന്താരാഷ്ട്ര ലഹരി മാഫിയ സംഘം വരെ ലക്ഷ്യമിട്ട് ‘സീറോ ടോളറൻസ്’ നയം തുടരുമെന്നും അധികൃതർ വ്യക്തമാക്കി.