മുംബൈ: വിപി റോഡ് പൊലീസ് സ്റ്റേഷന് കീഴിലുള്ള ടൂ ടാങ്ക് (ദോ ടാക്കി) പൊലീസ് ചൗക്കിയിൽ നിന്ന് പൊലീസിന്റെ വാക്കിടോക്കി തിരോധാനപ്പെട്ട സംഭവം സേനയ്ക്ക് കടുത്ത തലവേദനയാകുന്നു. ചൗക്കിയിൽ ചാർജ് ചെയ്യാനായി വെച്ചിരുന്ന ഔദ്യോഗിക വാക്കിടോക്കി ആണ് കാണാതായത്. സംഭവത്തിൽ അജ്ഞാത വ്യക്തിക്കെതിരെ കേസ് രജിസ്റ്റർ ചെയ്ത് പൊലീസ് വിപുലമായ അന്വേഷണം ആരംഭിച്ചു.
പൊലീസ് സേനയുടെ പ്രധാന ആശയവിനിമയ ഉപാധിയായ വാക്കിടോക്കി ചോർന്നത് സുരക്ഷാ വീഴ്ചയായി കാണുന്ന അധികൃതർ സംഭവം അതീവ ഗൗരവത്തോടെയാണ് കാണുന്നത്. മോഷ്ടാവിനെ കണ്ടെത്തുന്നതിനായി അന്വേഷണം ഊർജ്ജിതമാക്കിയിട്ടുണ്ട്.
ആരാണ് ഈ ‘ധൈര്യശാലി’എന്നതിനെക്കുറിച്ച് നിലവിൽ പൊലീസിന് യാതൊരു സൂചനയും ലഭിച്ചിട്ടില്ല. ചൗക്കിക്ക് സമീപത്തെ സിസിടിവി ദൃശ്യങ്ങൾ പരിശോധിച്ച് വരുകയാണെന്നും, അതിസാഹസികനായ മോഷ്ടാവിനെ ഉടൻ തന്നെ വലയിലാക്കുമെന്നും പൊലീസ് വ്യക്തമാക്കുന്നു.
