മുംബൈ : കൊങ്കൺ മേഖലയിലെ മാമ്പഴ–കശുവണ്ടി കർഷകർ നഷ്ടപരിഹാരം ആവശ്യപ്പെട്ട് മെയ് 15ന് മുംബൈയിലേക്ക് ‘ചലോ മുംബൈ’ പ്രതിഷേധ മാർച്ച് സംഘടിപ്പിക്കും. അസമയ മഴയും കാലാവസ്ഥാ വ്യതിയാനവും മൂലം കനത്ത കൃഷിനാശം സംഭവിച്ച സാഹചര്യത്തിലാണ് കർഷകർ സമരരംഗത്തേക്ക് എത്തുന്നത്.

രത്നഗിരി, സിന്ധുദുർഗ്, റായ്ഗഡ് തുടങ്ങിയ ജില്ലകളിൽ നിന്നായി ആയിരക്കണക്കിന് കർഷകർ പ്രതിഷേധത്തിൽ പങ്കെടുക്കുമെന്നാണ് വിവരം. ഹാപൂസ് മാമ്പഴത്തിന്റെയും കശുവണ്ടിയുടെയും ഉൽപാദനം ഈ വർഷം ഗണ്യമായി കുറഞ്ഞതായി കർഷക സംഘടനകൾ അറിയിച്ചു. തുടർച്ചയായ മഴയും കാലാവസ്ഥയിലെ മാറ്റവും മൂലം വിളകൾ വ്യാപകമായി നശിച്ചതോടെ കർഷകർ കടുത്ത സാമ്പത്തിക പ്രതിസന്ധിയിലാണെന്നും അവർ വ്യക്തമാക്കി.

സംസ്ഥാന സർക്കാർ പ്രഖ്യാപിച്ച സഹായധനം നഷ്ടത്തിന് അനുപാതികമല്ലെന്നാണ് കർഷകരുടെ ആരോപണം. യഥാർഥ നഷ്ടം കണക്കാക്കി പ്രത്യേക സാമ്പത്തിക പാക്കേജ് അനുവദിക്കണമെന്നും കൃഷിനാശം നേരിട്ട എല്ലാ കർഷകർക്കും അടിയന്തര നഷ്ടപരിഹാരം നൽകണമെന്നും സംഘടനകൾ ആവശ്യപ്പെട്ടു.

പ്രതിഷേധ മാർച്ചിന്റെ ഭാഗമായി മുംബൈയിൽ വൻ ധർണയും പ്രതിഷേധ പരിപാടികളും സംഘടിപ്പിക്കാനാണ് തീരുമാനം. ആവശ്യങ്ങൾ അംഗീകരിക്കാത്ത പക്ഷം സംസ്ഥാന വ്യാപകമായി സമരം ശക്തമാക്കുമെന്നും കർഷക സംഘടനകൾ മുന്നറിയിപ്പ് നൽകി.