മുംബൈ: ഛത്രപതി ശിവജി മഹാരാജ് അന്താരാഷ്ട്ര വിമാനത്താവളത്തിൽ മയക്കുമരുന്ന് കടത്തിനെതിരെ കസ്റ്റംസ് വിഭാഗം ശക്തമായ നടപടി തുടരുന്നു. 2025–26 സാമ്പത്തിക വർഷത്തിൽ മാർച്ച് 18 വരെ നടത്തിയ പരിശോധനകളിൽ 244 കേസുകളിലായി 1,330 കിലോഗ്രാമിൽ അധികം ഉയർന്ന നിലവാരത്തിലുള്ള വിദേശ കഞ്ചാവ് പിടികൂടിയതായി അധികൃതർ അറിയിച്ചു. ഇതുമായി ബന്ധപ്പെട്ട് 286 പേരെ അറസ്റ്റ് ചെയ്തിട്ടുണ്ട്.

വിമാനത്താവളത്തിലെ എയർ ഇന്റലിജൻസ് യൂണിറ്റ് നടത്തിയ പരിശോധനകളിലാണ് മയക്ക് മരുന്ന് കടത്തു പ്രവർത്തനങ്ങൾ വെളിപ്പെട്ടത്. പ്രധാനമായും വിദേശ രാജ്യങ്ങളിൽ നിന്ന്, പ്രത്യേകിച്ച് ബാങ്കോക്കിൽ നിന്നുള്ള വിമാന സർവീസുകൾ വഴിയാണ് മയക്കുമരുന്ന് കടത്ത് നടക്കുന്നതെന്ന് അന്വേഷണത്തിൽ വ്യക്തമായി.

സമീപകാല സംഭവത്തിൽ ബാങ്കോക്കിൽ നിന്നെത്തിയ നാല് യാത്രക്കാരിൽ നിന്ന് 64.39 കിലോഗ്രാം കഞ്ചാവ് പിടികൂടി. ഏകദേശം 64 കോടി രൂപ വിലമതിക്കുന്ന മയക്കുമരുന്ന് സ്യൂട്ട്‌കേസുകളിൽ ഒളിപ്പിച്ച നിലയിലായിരുന്നു. നാലുപേരെയും എൻഡിപിഎസ് നിയമപ്രകാരം അറസ്റ്റ് ചെയ്തു.

മയക്കുമരുന്ന് കടത്തിനെതിരെ നിരീക്ഷണവും പരിശോധനയും കൂടുതൽ ശക്തമാക്കിയതായി കസ്റ്റംസ് അധികൃതർ അറിയിച്ചു. രാജ്യാന്തര ശൃംഖലയുമായി ബന്ധപ്പെട്ട സംഘങ്ങളുടെ ഇടപെടൽ ഈ കേസുകൾ സൂചിപ്പിക്കുന്നതായി വിലയിരുത്തുന്നു. അന്വേഷണം വ്യാപിപ്പിച്ചിരിക്കുകയാണെന്നും കൂടുതൽ പിടിച്ചെടുക്കലുകൾക്ക് സാധ്യതയുണ്ടെന്നും അധികൃതർ അറിയിച്ചു.