നവിമുംബൈ : വാഷി സെക്ടർ–8ലെ ന്യൂ ബോംബെ അയ്യപ്പ മിഷൻ ക്ഷേത്രത്തിൽ ഫെബ്രുവരി 15 മുതൽ 22 വരെ ‘ശ്രീമദ് ഭാഗവത പാരായണ സമർപ്പണ സപ്താഹം’ ഭക്തിപൂർവം നടക്കുന്നു. നിരവധി ഭക്തരുടെ സാന്നിധ്യത്തിൽ ചടങ്ങുകൾ ആരംഭിച്ചു.

പ്രശസ്ത യജ്ഞാചാര്യയായ ലതിക മേനോന്റെ നേതൃത്വത്തിലാണ് സപ്താഹം സംഘടിപ്പിച്ചിരിക്കുന്നത്. അവരുടെ 21 ശിഷ്യരാണ് പാരായണത്തിൽ പങ്കെടുക്കുന്നത്. കഴിഞ്ഞ മൂന്ന് വർഷത്തിലധികമായി ഓൺലൈനായും നേരിട്ടുമുള്ള ക്ലാസുകൾ വഴി നൽകിയ പരിശീലനത്തിന്റെ ഫലമായാണ് ഇവർ ഈ ആത്മീയ ദൗത്യത്തിന് സജ്ജരായത്.

50 മുതൽ 84 വയസ്സ് വരെയുള്ള ശിഷ്യരാണ് സപ്താഹത്തിൽ പങ്കാളികളാകുന്നത് എന്നത് ശ്രദ്ധേയമാണ്. പ്രായത്തെ മറികടന്ന് ആത്മീയ പഠനത്തിനും അഭ്യാസത്തിനും അവർ നൽകിയ പ്രതിബദ്ധത വലിയ പ്രചോദനമായി മാറുന്നു.

പരിശീലനത്തിനും പരിപാടികളുടെ ഒരുക്കങ്ങൾക്കുമായി ക്ഷേത്ര ഭരണസമിതി പൂർണ പിന്തുണ നൽകിയതായി സംഘാടകർ അറിയിച്ചു.

ആത്മീയ ചിന്തകൾക്കും ഭക്തിസാന്ദ്രമായ അനുഭവങ്ങൾക്കും വഴിയൊരുക്കുന്ന ഈ ഭാഗവത സപ്താഹം വാഷിയിലെ ഭക്തജനങ്ങൾക്ക് പ്രത്യേക ആത്മീയ വിരുന്നായി മാറുകയാണ്.