താനെ: താനെക്കാരുടെ ദീർഘകാല മെട്രോ സ്വപ്നം യാഥാർഥ്യത്തിലേക്ക്. മെട്രോ റൂട്ട് 4-ന്റെ ഭാഗമായ ഗൈമുഖ് – കപൂർബാവ്ഡി പാതയിലെ പരീക്ഷണയോട്ടം വിജയകരമായി പൂർത്തിയാക്കി. സാങ്കേതിക, സുരക്ഷാ പരിശോധനകൾ പൂർത്തിയാക്കി ഡിസംബറോടെ യാത്രക്കാർക്കായി പാത തുറന്നുകൊടുക്കാനാകുമെന്ന് മഹാരാഷ്ട്ര ഗതാഗത മന്ത്രി പ്രതാപ് സർനായിക് അറിയിച്ചു. സോഷ്യൽ മീഡിയയിലൂടെയാണ് മന്ത്രി ഈ വിവരം പങ്കുവെച്ചത്. 

ഗൈമുഖ്, കാസർവദാവ്‌ലി, വാഗ്ബീൽ, മാൻപാഡ, ടികുജിനിവാഡി, ഡോങ്രിപാഡ, വിജയ് ഗാർഡൻ, കപൂർബാവ്ഡി എന്നീ പ്രദേശങ്ങളിലുള്ള ആയിരക്കണക്കിന് യാത്രക്കാർക്ക് പുതിയ സർവീസ് വലിയ ആശ്വാസമാകും. കൂടുതൽ മെച്ചപ്പെട്ട ഗതാഗത സൗകര്യം വേണമെന്ന ഈ മേഖലകളിലെ ഉയർന്ന ആവശ്യത്തിനുള്ള പരിഹാരമാണിത്.

വഡാലയെയും കാസർവദാവ്‌ലിയെയും ബന്ധിപ്പിക്കുന്ന 32.32 കിലോമീറ്റർ ദൈർഘ്യമുള്ള എലിവേറ്റഡ് പാതയായ മെട്രോ റൂട്ട് 4-ന്റെ ഭാഗമായാണ് ഈ റൂട്ട് വികസിപ്പിച്ചിരിക്കുന്നത്. മുംബൈ മെട്രോപൊളിറ്റൻ റീജിയൻ ഡെവലപ്‌മെന്റ് അതോറിറ്റിയാണ് (എംഎംആർഡിഎ) ഈ പദ്ധതി നടപ്പിലാക്കുന്നത്. വഡാല – കാസർവദാവ്‌ലി മെട്രോ 4 പാതയും, കാസർവദാവ്‌ലി – ഗൈമുഖ് നീട്ടിയ പാതയായ മെട്രോ 4എ-യും ഇതിൽ ഉൾപ്പെടുന്നു.