താനെ: മൺസൂണിന് മുന്നോടിയായുള്ള ഓട ശുചീകരണ ജോലികൾ പൂർത്തിയായെന്ന മുൻസിപ്പൽ കോർപ്പറേഷന്റെ അവകാശവാദങ്ങൾ പൊള്ളയാണെന്നും രേഖകളിൽ മാത്രമാണ് ശുചീകരണം നടന്നിട്ടുള്ളതെന്നും താനെ സിറ്റി ഡിസ്ട്രിക്ട് കോൺഗ്രസ് അധ്യക്ഷൻ രാഹുൽ പിംഗളെ ആരോപിച്ചു. മുംബ്ര പ്രഭാഗ് സമിതി ഓഫീസിന് മുന്നിലെ പ്രധാന ഓട പോലും വൃത്തിയാക്കാത്ത അധികൃതരുടെ നടപടിക്കെതിരെ അദ്ദേഹത്തിന്റെ നേതൃത്വത്തിൽ കോൺഗ്രസ് പ്രവർത്തകർ രംഗത്തിറങ്ങി.
രാഹുൽ പിംഗളെയുടെ നേതൃത്വത്തിൽ നടത്തിയ പരിശോധനയിലാണ് കോർപ്പറേഷൻ ഓഫീസിന് മുന്നിലെ ഈ വലിയ വീഴ്ച പുറത്തായത്. വിവരമറിയിച്ചിട്ടും ഉദ്യോഗസ്ഥർ നടപടിയെടുക്കാത്തതിനെത്തുടർന്ന് കോൺഗ്രസ് പ്രതിനിധി സംഘം മുംബ്ര ഓഫീസിലെത്തി പ്രതിഷേധിച്ചു. ആക്രമണോത്സുകമായ സമരത്തിന് പകരം ‘ഗാന്ധിഗിരി’ മാർഗ്ഗം സ്വീകരിച്ച നേതാക്കൾ സോളിഡ് വേസ്റ്റ് മാനേജ്മെന്റ്, പബ്ലിക് വർക്സ് വകുപ്പ് ഉദ്യോഗസ്ഥർക്ക് റോസാപ്പൂക്കൾ നൽകിയാണ് അടിയന്തര നടപടി ആവശ്യപ്പെട്ടത്.
മഴക്കാലത്തെ വെള്ളപ്പൊക്കം ഒഴിവാക്കാൻ ജോലി ഉടൻ തീർത്തില്ലെങ്കിൽ കമ്മീഷണർ ഓഫീസിന് മുന്നിൽ കുത്തിയിരിപ്പ് സമരം നടത്തുമെന്നും കോൺഗ്രസ് മുന്നറിയിപ്പ് നൽകി.
ബ്ലോക്ക് പ്രസിഡന്റ് നിലേഷ് പാട്ടീൽ, യാസിൻ മോമിൻ, വസന്ത് പൊലാഡിയ, വസീം സയ്യിദ്, രവീന്ദ്ര കോളി, ഭോലാ പാട്ടീൽ, വൈശാലി ഭോസ്ലെ, ഗഫൂർ റുമാനി, അഫ്സർ ഖാൻ, ബിലാൽ താംബോളി, നിയാസ് കുർണേ, മുജാവർ സർ, രാജു ധാവ്ളെ, ഗൗരവ് കാംബ്ലെ, രാജേഷ് മിശ്ര, ചന്ദ്രകാന്ത് പാട്ടീൽ, ശരദ് ജാദവ് തുടങ്ങിയ ഭാരവാഹികളും പ്രതിഷേധത്തിൽ പങ്കെടുത്തു.
ഓട ശുചീകരണ അവകാശവാദങ്ങൾ കടലാസിൽ മാത്രമാണ്. ഇന്ന് ഞങ്ങൾ റോസാപ്പൂവാണ് നൽകിയത്; നാളെ ജനങ്ങളുടെ രോഷം നേരിടാൻ ഭരണകൂടം തയ്യാറായിക്കൊള്ളണം.”
— രാഹുൽ പിംഗളെ പറഞ്ഞു.
