മുംബൈ: മഹാനഗരത്തിലെ ജനങ്ങളുടെ വിശ്വസ്ത വാഹനമായ ബെസ്റ്റ് (BEST) ബസുകൾ നിരത്തുകളിൽ അപകടഭീതി വിതയ്ക്കുന്നതായി ഞെട്ടിക്കുന്ന കണക്കുകൾ. മൂന്ന് വർഷത്തിനിടെ (2023 ജനുവരി മുതൽ 2025 ഡിസംബർ വരെ) ബെസ്റ്റ് ബസുകൾ ഉൾപ്പെട്ട 958 ഗുരുതര അപകടങ്ങളാണ് മുംബൈയിൽ റിപ്പോർട്ട് ചെയ്തത്. ഈ അപകടങ്ങളിൽ 77 പേർക്ക് ജീവൻ നഷ്ടമാവുകയും 217 പേർക്ക് പരിക്കേൽക്കുകയും ചെയ്തു. ദാദറിൽ ഒരു ഡെലിവറി ബോയിയുടെ മരണത്തിനിടയാക്കിയ പുതിയ ബസ് അപകടത്തിന്റെ പശ്ചാത്തലത്തിൽ, സ്വകാര്യ കരാറുകാരെ ഏൽപ്പിച്ച് നടത്തുന്ന ‘വെറ്റ്-ലീസ്’ (Wet-lease) പ്രവർത്തന മാതൃക പുനഃപരിശോധിക്കാൻ അധികൃതർ നിർബന്ധിതരായിരിക്കുകയാണ്.

ബെസ്റ്റ് ബസ് അപകടങ്ങളിൽ 85 ശതമാനത്തിലധികവും സ്വകാര്യ കരാറുകാർക്ക് കീഴിൽ സർവീസ് നടത്തുന്ന ‘വെറ്റ്-ലീസ്’ ബസുകളാണ് വരുത്തിവച്ചതെന്നാണ് പുറത്തുവരുന്ന വിവരം. ഈ മാതൃക അനുസരിച്ച് ബസുകളും ഡ്രൈവർമാരും സ്വകാര്യ ഓപ്പറേറ്റർമാരാണ് നൽകുന്നത്. എന്നാൽ കുറഞ്ഞ ശമ്പളമാണ് ഈ കരാറുകാർ ഡ്രൈവർമാർക്ക് നൽകുന്നതെന്നും ഇത് അവരുടെ ജോലിഭാരവും ക്ഷീണവും വർദ്ധിപ്പിക്കുന്നുവെന്നും ബെസ്റ്റ് കമ്മിറ്റി അംഗവും ബിജെപി നേതാവുമായ സുനിൽ ഗാനാചാര്യ ആരോപിച്ചു. കുറഞ്ഞ ശമ്പളം കാരണം ഡ്രൈവർമാർക്ക് ആവശ്യത്തിന് വിശ്രമം ലഭിക്കുന്നില്ലെന്നും അദ്ദേഹം ചൂണ്ടിക്കാട്ടി.

വെറ്റ്-ലീസ് ബസുകളിലുള്ള ജനങ്ങളുടെ വിശ്വാസം നഷ്ടപ്പെടുകയാണെന്നും സ്ഥിതി മെച്ചപ്പെട്ടില്ലെങ്കിൽ ഈ മാതൃക തന്നെ നിർത്തലാക്കേണ്ടി വരുമെന്നും ബെസ്റ്റ് കമ്മിറ്റി ചെയർപേഴ്‌സൺ തൃഷ്ണ വിശ്വാസ്രാവു വ്യക്തമാക്കി. അപകടങ്ങൾ കുറയ്ക്കാനും ഡ്രൈവർമാരുടെ ശമ്പളം വർദ്ധിപ്പിക്കാനും ഇവർ കരാറുകാർക്ക് കർശന നിർദ്ദേശം നൽകി. സാങ്കേതിക തകരാറുകൾ അവഗണിക്കുന്ന ബസുകൾക്ക് 10,000 രൂപ വീതം പിഴ ചുമത്താൻ ബെസ്റ്റ് തീരുമാനിച്ചിട്ടുണ്ട്. വരും ദിവസങ്ങളിൽ എല്ലാ ഡിപ്പോകളിലും കർശനമായ പരിശോധനകൾ ഉറപ്പാക്കുമെന്നും അധികൃതർ അറിയിച്ചു.