മുംബൈ: മഹാരാഷ്ട്രയിലെ വോട്ടർപട്ടിക പുതുക്കൽ നടപടിയായ സ്‌പെഷ്യൽ ഇന്റൻസീവ് റിവിഷൻ (SIR) സമയപരിധി കേന്ദ്ര തിരഞ്ഞെടുപ്പ് കമ്മീഷൻ നീട്ടി. പുതുക്കിയ സമയക്രമമനുസരിച്ച് പരാതികളും ആക്ഷേപങ്ങളും സമർപ്പിക്കാനുള്ള തീയതി നവംബർ 13 വരെ നീട്ടി നൽകി. അന്തിമ വോട്ടർപട്ടിക നവംബർ 30-ന് പ്രസിദ്ധീകരിക്കും. 2026 ഒക്ടോബർ 1 യോഗ്യതാ തീയതിയായി നിശ്ചയിച്ചാണ് വോട്ടർപട്ടിക പുതുക്കുന്നത്.

മഹാരാഷ്ട്ര ചീഫ് ഇലക്ട്രൽ ഓഫീസറുടെ അഭ്യർത്ഥനയും മുൻ ഉത്തരവുകളും പരിഗണിച്ച് ഇലക്ഷൻ കമ്മീഷൻ അണ്ടർ സെക്രട്ടറി സന്ദീപ് കുമാർ ആണ് ഒക്ടോബർ 29-ന് ഉത്തരവ് പുറപ്പെടുവിച്ചത്. പുതുക്കിയ സമയക്രമപ്രകാരം ഓഗസ്റ്റ് 31 മുതൽ നവംബർ 13 വരെ ആക്ഷേപങ്ങളും അവകാശവാദങ്ങളും ഉന്നയിക്കാം. ഇവയുടെ പരിശോധനയും തീർപ്പാക്കലും നവംബർ 25 വരെ തുടരും. മാറ്റങ്ങൾ വരുത്തിയ പുതിയ തീയതികൾ സംസ്ഥാന ഗസറ്റിൽ ഉടൻ പ്രസിദ്ധീകരിക്കാനും ജനങ്ങളെ അറിയിക്കാനും തിരഞ്ഞെടുപ്പ് കമ്മീഷൻ നിർദ്ദേശം നൽകിയിട്ടുണ്ട്. ഈ നിർദ്ദേശത്തിന്റെ പകർപ്പ് മഹാരാഷ്ട്ര ചീഫ് സെക്രട്ടറിക്ക് കൈമാറി. കടുപ്പമേറിയ സമയപരിധികൾ വെക്കരുതെന്ന് സുപ്രീം കോടതി തിരഞ്ഞെടുപ്പ് കമ്മീഷനോട് നിർദ്ദേശിച്ചതിന് തൊട്ടുപിന്നാലെയാണ് ഈ നടപടി.

കരട് വോട്ടർപട്ടികയിൽ നിന്ന് വലിയ തോതിൽ പേരുകൾ ഒഴിവാക്കപ്പെട്ടതും വെരിഫിക്കേഷൻ നടത്താൻ ജീവനക്കാരുടെ കുറവ് നേരിടുന്നതും വൻ പ്രതിഷേധത്തിന് ഇടയാക്കിയിരുന്നു. രാജ്യത്തുടനീളം 13 കോടി പേരുകൾ വോട്ടർപട്ടികയിൽ നിന്ന് നീക്കം ചെയ്തതിൽ മഹാരാഷ്ട്രയിൽ മാത്രം രണ്ട് കോടി പേരുകളാണ് ഒഴിവാക്കപ്പെട്ടത്. മുംബൈയിൽ മാത്രം 34 ലക്ഷം പേർ വോട്ടർപട്ടികയ്ക്ക് പുറത്തായി. എന്നാൽ സ്ഥലത്തില്ലാത്തവർ, താമസം മാറിയവർ, മരിച്ചവർ, ഇരട്ട രജിസ്ട്രേഷൻ ഉള്ളവർ എന്നിവരുടെ പേരുകളാണ് ഒഴിവാക്കിയതെന്നാണ് തിരഞ്ഞെടുപ്പ് കമ്മീഷന്റെ വിശദീകരണം. വിട്ടുപോയവർക്കായി പ്രത്യേക ക്യാമ്പുകളും സംഘടിപ്പിക്കുന്നുണ്ട്.

എന്നാൽ, പരിശോധന നടത്താൻ ബൂത്ത് ലെവൽ ഓഫീസർമാരുടെ (BLO) ക്ഷാമമുണ്ടെന്ന് രാഷ്ട്രീയ നേതാക്കൾ ആരോപിച്ചു. വീടുകൾ സന്ദർശിച്ച് പരിശോധന നടത്താൻ ആവശ്യത്തിന് ജീവനക്കാരില്ലാത്തതിനാൽ ഈ പ്രക്രിയ പൂർണ്ണ പരാജയമാണെന്ന് മുംബാദേവി എം.എൽ.എ അമീൻ പട്ടേൽ പറഞ്ഞു. സമയപരിധി നീട്ടിയതിനെ സ്വാഗതം ചെയ്യുന്നുണ്ടെങ്കിലും ഈ നടപടികൾ മുഴുവനായി ഉപേക്ഷിക്കണമെന്നാണ് തന്റെ അഭിപ്രായമെന്നും അദ്ദേഹം വ്യക്തമാക്കി.