മുംബൈ: കോക്‌റോച്ച് ജനതാ പാർട്ടി (CJP) ഒക്ടോബർ 2 വെള്ളിയാഴ്ച മുംബൈയിൽ സംഘടിപ്പിച്ച പ്രതിഷേധത്തിൽ പ്രായപൂർത്തിയാകാത്ത കുട്ടികളെ പങ്കെടുപ്പിച്ചെന്ന ആരോപണത്തിൽ ദേശീയ മനുഷ്യാവകാശ കമ്മീഷൻ (NHRC) അന്വേഷണത്തിന് ഉത്തരവിട്ടു. വിഷയത്തിൽ കമ്മീഷൻ സ്വമേധയാ കേസ് എടുത്തു. കുട്ടികളുടെ പങ്കാളിത്തവും അവരുടെ ചിത്രങ്ങൾ ഓൺലൈനിൽ പ്രചരിപ്പിച്ചതും സംബന്ധിച്ച് സമഗ്ര അന്വേഷണം നടത്താൻ മുംബൈ പോലീസിന് നിർദ്ദേശം നൽകി.

​സേവാ ന്യായ ഉത്ഥാൻ ഫൗണ്ടേഷനും മറ്റൊരു സംഘടനയും നൽകിയ പരാതികളുടെ അടിസ്ഥാനത്തിലാണ് പ്രിയങ്ക് കാനൂംഗോ അധ്യക്ഷനായ മനുഷ്യാവകാശ കമ്മീഷൻ ബെഞ്ചിന്റെ നടപടി. ദേശീയ പതാകയും പ്ലക്കാർഡും ഏന്തിയ ജനക്കൂട്ടത്തിനിടയിൽ ചെറിയ കുട്ടിയെ ഉയർത്തിപ്പിടിച്ച് മുദ്രാവാക്യം വിളിക്കുന്നതിന്റെയും ഇതിന്റെ ദൃശ്യങ്ങൾ പകർത്തുന്നതിന്റെയും ചിത്രങ്ങൾ എക്‌സിൽ (X) പ്രചരിച്ചതായി പരാതിയിൽ പറയുന്നു. കുട്ടികളെ കസ്റ്റഡിയിലെടുക്കാൻ പോലീസിന് കഴിയില്ലെന്ന് ചൂണ്ടിക്കാട്ടി പ്രായപൂർത്തിയാകാത്തവരെ പ്രതിഷേധത്തിന് എത്തിക്കാൻ വാട്ട്‌സ്ആപ്പ് ഗ്രൂപ്പുകളിൽ ആസൂത്രണം നടന്നതായും കമ്മീഷൻ വ്യക്തമാക്കി.
​പ്രതിഷേധത്തിന് കുട്ടികളെ എത്തിക്കുന്നതിൽ പങ്കുവഹിച്ച സംഘാടകർ, കോഓർഡിനേറ്റർമാർ, കൂടെയുണ്ടായിരുന്ന മുതിർന്നവർ എന്നിവരുടെ പങ്ക് വിശദമായി അന്വേഷിക്കാൻ പോലീസിന് നിർദ്ദേശം നൽകിയിട്ടുണ്ട്. അജിങ്ക്യ ഷിൻഡെ, അഭിജിത് ദിപ്കെ, സൗരവ് ദാസ് എന്നിവരുടെ പങ്കും സന്ദേശങ്ങളും അന്വേഷണപരിധിയിൽ കൊണ്ടുവരാനും വ്യക്തമായ തെളിവുകളുടെ അടിസ്ഥാനത്തിൽ ഉത്തരവാദിത്തം നിശ്ചയിക്കാനും കമ്മീഷൻ നിർദ്ദേശിച്ചു.

സംഭവവുമായി ബന്ധപ്പെട്ട അക്കൗണ്ട് വിവരങ്ങൾ, യുആർഎൽ (URL), പോസ്റ്റ് ഐഡി, ടൈംസ്റ്റാമ്പ്, മെറ്റാഡാറ്റ എന്നിവയുൾപ്പെടെയുള്ള ഡിജിറ്റൽ തെളിവുകൾ സുരക്ഷിതമായി സൂക്ഷിക്കാൻ എക്സ് കോർപ്പറേഷനോട് കമ്മീഷൻ ആവശ്യപ്പെട്ടു. കൂടാതെ, കുട്ടികളുടെ സുരക്ഷയും നിയമപരമായ ബാധ്യതകളും പാലിക്കുന്നതിൽ എക്സ് കോർപ്പറേഷൻ വീഴ്ച വരുത്തിയിട്ടുണ്ടോ എന്ന് പരിശോധിക്കാൻ കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിനും (MeitY) നിർദ്ദേശം നൽകി.