മുംബൈ: മുംബൈ ലോക്കൽ ട്രെയിനിൽ 22കാരനായ മായങ്ക് ലോഹർ കുത്തേറ്റു മരിച്ച സംഭവത്തിൽ മുഖ്യപ്രതിക്കെതിരെയുള്ള കുറ്റപത്രം സമർപ്പിക്കുന്നത് സെഷൻസ് കോടതി മാറ്റിവെച്ചു. പ്രതിയായ റോഷൻ സുവർണയെ നേരിട്ട് ഹാജരാക്കാത്തതിനെത്തുടർന്നാണ് കോടതി നടപടി വൈകിച്ചത്.
​താനെ ജയിലിൽ കഴിയുന്ന പ്രതിയെ കോടതിയിൽ നേരിട്ട് ഹാജരാക്കണമെന്ന കർശന നിർദ്ദേശം ലംഘിച്ചതിന് ജയിൽ അധികാരികളെ കോടതി രൂക്ഷമായി വിമർശിച്ചു. ഉത്തരവ് ഉണ്ടായിരുന്നിട്ടും പ്രതിയെ നേരിട്ട് എത്തിക്കാതെ വീഡിയോ കോൺഫറൻസിങ് വഴിയാണ് ഹാജരാക്കിയത്. എന്നാൽ വീഡിയോ കോൺഫറൻസിങ്ങിൽ സാങ്കേതിക തടസ്സങ്ങളും വലിയ തോതിൽ ശബ്ദ തടസ്സങ്ങളും ഉണ്ടായതിനെത്തുടർന്ന് കുറ്റങ്ങൾ ചുമത്താൻ സാധിച്ചില്ല. സംഭവത്തിൽ പ്രതിയായ റോഷൻ സുവർണയ്‌ക്കെതിരെ കോടതി പ്രൊഡക്ഷൻ വാറണ്ട് പുറപ്പെടുവിച്ചിട്ടുണ്ട്.

അതേസമയം, കേസിന്റെ വിചാരണ വേഗത്തിൽ പൂർത്തിയാക്കാൻ കഴിഞ്ഞ മാസം ഹൈക്കോടതി സെഷൻസ് കോടതിക്ക് നിർദ്ദേശം നൽകിയിരുന്നു. ഇതിന്റെ അടിസ്ഥാനത്തിൽ കേസിന്റെ വിചാരണാ നടപടികൾക്കായി അഡ്വക്കേറ്റ് അജയ് മിസാറിനെ സ്പെഷ്യൽ പബ്ലിക് പ്രോസിക്യൂട്ടറായി സർക്കാർ നിയമിച്ചിട്ടുണ്ട്. അടുത്ത തവണ കേസ് പരിഗണിക്കുമ്പോൾ പ്രതിക്കെതിരെ കുറ്റങ്ങൾ ചുമത്താനാണ് കോടതിയുടെ തീരുമാനം.