മുംബൈ: കഴിഞ്ഞ പത്തുവർഷത്തിനിടയിലെ ഏറ്റവും കുറഞ്ഞ രണ്ടാമത്തെ സെപ്റ്റംബർ മഴയ്ക്ക് സാക്ഷ്യം വഹിച്ച് മുംബൈ നഗരം. കേന്ദ്ര കാലാവസ്ഥാ വകുപ്പിന്റെ കണക്കനുസരിച്ച് നഗരത്തിലെ പ്രധാന നിരീക്ഷണകേന്ദ്രമായ സാന്താക്രൂസിൽ സെപ്റ്റംബറിൽ ലഭിച്ചത് 306.6 മില്ലീമീറ്റർ മഴ മാത്രമാണ്. ഈ മാസത്തിൽ ലഭിക്കേണ്ട സാധാരണ ശരാശരി മഴയായ 359.6 മില്ലീമീറ്ററിനേക്കാൾ 15 ശതമാനം കുറവാണിത്. കഴിഞ്ഞ ഒരു പതിറ്റാണ്ടിനിടയിൽ ഏറ്റവും കുറഞ്ഞ സെപ്റ്റംബർ മഴ ലഭിച്ചത് 2018-ലാണ്; അന്ന് സാന്താക്രൂസിൽ 73.1 മില്ലീമീറ്ററും കൊളാബയിൽ 59.5 മില്ലീമീറ്ററും മഴ മാത്രമാണ് പെയ്തത്.
സെപ്റ്റംബറിൽ കുറവുണ്ടായെങ്കിലും നഗരപ്രാന്തങ്ങളിൽ നാലുമാസത്തെ കാലവർഷം ആകമാനം നോക്കുമ്പോൾ മോശമായിരുന്നില്ല. ജൂൺ മുതൽ സെപ്റ്റംബർ വരെയുള്ള കാലയളവിൽ സാന്താക്രൂസിൽ ആകെ 2,530.5 മില്ലീമീറ്റർ മഴ ലഭിച്ചു. ഇവിടുത്തെ സാധാരണ സീസൺ ശരാശരിയായ 2,318.8 മില്ലീമീറ്ററിനേക്കാൾ കൂടുതലാണിത്. എന്നാൽ കൊളാബയിൽ സാധാരണ ലഭിക്കേണ്ട 2,094.6 മില്ലീമീറ്ററിന് പകരം 1,957.1 മില്ലീമീറ്റർ മഴ മാത്രമാണ് ലഭിച്ചത്.
ഓഗസ്റ്റ് 15-ന് ശേഷം നഗരത്തിൽ മഴ വിട്ടുനിന്നതാണ് മഴക്കുറവിന് പ്രധാന കാരണം. ബംഗാൾ ഉൾക്കടലിൽ രൂപപ്പെട്ട ന്യൂനമർദ്ദങ്ങൾ പ്രതീക്ഷിച്ചതുപോലെ മധ്യപ്രദേശിലേക്കും മഹാരാഷ്ട്രയിലേക്കും പടിഞ്ഞാറൻ ദിശയിൽ നീങ്ങാതിരുന്നതാണ് മഴയുടെ വിതരണം അസമത്വമുള്ളതാക്കിയത്. ഇവ പ്രദേശത്തേക്ക് എത്തിയപ്പോഴൊക്കെ ശക്തമായ മഴ ലഭിച്ചെങ്കിലും, മഴക്കാലത്തിനിടയിലെ നീണ്ട ഇടവേളകൾ തിരിച്ചടിയായി.
എന്നാൽ, കാലവർഷം പൂർണ്ണമായി വിടപറയുന്നതിന് മുൻപ് മഹാരാഷ്ട്രയുടെ വിവിധ ഭാഗങ്ങളിൽ വീണ്ടും മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. മധ്യ മഹാരാഷ്ട്രയിലും കൊങ്കണിന്റെ ചില ഭാഗങ്ങളിലും ശക്തമായ കാറ്റോടും ഇടിമിന്നലത്തോടും കൂടിയ മഴ ഉണ്ടാകും. സെപ്റ്റംബർ 29 ചൊവ്വാഴ്ച താാനെ, സാംഗ്ലി, സത്താറ എന്നീ പ്രദേശങ്ങളിൽ മഴ പെയ്തിരുന്നു.
മുംബൈ, പാൽഘർ, സിന്ധുദുർഗ്, ഛത്രപതി സംഭാജിനഗർ, ബീഡ് എന്നീ ജില്ലകളിൽ നേരിയതോ മിതമായതോ ആയ മഴയ്ക്കാണ് സാധ്യത. താാനെ, റായ്ഗഡ്, രത്നഗിരി, കോലാപ്പൂർ, കോലാപ്പൂർ ചുരം, സാംഗ്ലി, സത്താറ, സത്താറ ചുരം, പുനെ, സോലാപ്പൂർ, അഹല്യാനഗർ, നാസിക് എന്നിവിടങ്ങളിൽ ഇടിമിന്നലോട് കൂടിയ മഴ മുന്നറിയിപ്പുണ്ട്. രാജ്യത്തിന്റെ വിവിധ ഭാഗങ്ങളിൽ നിന്ന് പിൻവാങ്ങിത്തുടങ്ങിയ തെക്കുപടിഞ്ഞാറൻ കാലവർഷം വരുംദിവസങ്ങളിൽ മഹാരാഷ്ട്രയിൽ നിന്നും പൂർണ്ണമായി മടങ്ങും. ഒക്ടോബർ 8-നാണ് സാധാരണയായി മുംബൈയിൽ നിന്ന് കാലവർഷം പിൻവാങ്ങാറുള്ളത്.
