മുംബൈ: ബോംബെ ഹൈക്കോടതിയിൽ വാദത്തിനിടെ ജഡ്ജിക്ക് നേരെ യുവതി പേഴ്സ് വലിച്ചെറിയാൻ ശ്രമിച്ച സംഭവത്തിൽ കോടതിയലക്ഷ്യ നടപടിക്ക് ഉത്തരവിട്ട് കോടതി. സ്വത്തുതർക്ക കേസിൽ പ്രതികൂലമായ വിധി വന്നതിനെ തുടർന്നാണ് ജസ്റ്റിസ് മാധവ് ജാംദാറിന് നേരെ കോടതിമുറിയിൽ വെച്ച് ഈ കൈയേറ്റ ശ്രമം ഉണ്ടായത്.

കോടതിയുടെ മാതൃകയും അന്തസ്സും തകർക്കുന്ന ഇത്തരം നടപടികൾ ഒരിക്കലും അംഗീകരിക്കാനാവില്ലെന്നും ഒരു കക്ഷിയും കോടതിക്ക് മുകളിലല്ലെന്നും ജസ്റ്റിസ് മാധവ് ജാംദാറുടെ ബെഞ്ച് വ്യക്തമാക്കി. വിധി എതിരായാൽ എന്തും ചെയ്യാമെന്ന് കക്ഷികൾ കരുതരുത്. ഭയമോ പക്ഷപാതമോ ഇല്ലാതെയാണ് കോടതി പ്രവർത്തിക്കുന്നത് എന്നും ജസ്റ്റിസ് ജാംദാർ മുന്നറിയിപ്പ് നൽകി. കോടതി നടപടികൾക്കിടയിൽ സന്നിഹിതരായിരുന്ന കുടുംബാംഗങ്ങൾക്കൊപ്പമുണ്ടായിരുന്ന Minder Gurmit Singh Thukral എന്ന യുവതിയാണ് ജഡ്ജിക്ക് നേരെ പേഴ്സ് വലിച്ചെറിയാൻ ശ്രമിച്ചത്.

ഉടൻതന്നെ കോടതിയിലെ പോലീസുകാരെ വിളിച്ചുവരുത്തിയ ജഡ്ജി, യുവതിയെ കോടതിമുറിയിൽ നിന്ന് പുറത്താക്കാൻ ഉത്തരവിടുകയായിരുന്നു. സംഭവത്തിൽ യുവതി എഴുതി നൽകിയ മാപ്പ് സ്വീകരിക്കാൻ ജഡ്ജി തയ്യാറായില്ല. കനത്ത പിഴയൊടുക്കേണ്ടി വരുമെന്നും ജയിലിൽ അടക്കേണ്ടി വരുമെന്നും മുന്നറിയിപ്പ് നൽകിയ കോടതി, യുവതിക്കെതിരെ കോടതിയലക്ഷ്യത്തിന് ഔദ്യോഗികമായി നടപടി സ്വീകരിച്ചു.

2009-ൽ പ്രോപ്പർട്ടി ഉടമയായ ഓങ്കർ സിംഗ് കർല നൽകിയ ഒഴിപ്പിക്കൽ ഹർജിയുമായി ബന്ധപ്പെട്ടതാണ് കേസ്. വാടകക്കാരനായ തർലോക് സിംഗ് തുക്രലിന്റെ മരണശേഷം അദ്ദേഹത്തിന്റെ മക്കളായ ജസ്പൽ സിംഗ് തുക്രൽ , ഗുരുമിത് സിംഗ് തുക്രൽ എന്നിവരെ നിയമപരമായ അനന്തരാവകാശികളായി ഉൾപ്പെടുത്തിയിരുന്നു. 2018 ജൂലൈയിൽ കോടതി ഉത്തരവ് ഉടമയ്ക്ക് അനുകൂലമായി വരികയും 2025 ഏപ്രിലിൽ ഒഴിപ്പിക്കൽ നടപടികൾ പൂർത്തിയാവുകയും ചെയ്തിരുന്നു. എന്നാൽ ഒഴിപ്പിക്കൽ ഉത്തരവ് ലംഘിച്ച് എതിർകക്ഷികൾ വീണ്ടും സ്ഥലത്ത് പ്രവേശിച്ചുവെന്ന് ചൂണ്ടിക്കാണിച്ചാണ് ഉടമയുടെ കുടുംബം ഹൈക്കോടതിയെ സമീപിച്ചത്.

തുടർന്ന് നടത്തിയ വാദങ്ങൾക്കും ഉത്തരവുകൾക്കും പിന്നാലെയാണ് കോടതിമുറിയിൽ നാടകീയ സംഭവങ്ങൾ അരങ്ങേറിയത്. കേസിൽ പ്രതികളുടെ ഭാഗത്തുനിന്നുണ്ടായേക്കാവുന്ന കോടതിയലക്ഷ്യ നടപടികൾ കേൾക്കുന്നതിനായി കേസ് ഒക്ടോബർ 30-ലേക്ക് മാറ്റിവെച്ചു.