മുംബൈ: തെക്കുപടിഞ്ഞാറൻ മൺസൂൺ പിൻവാങ്ങുന്നതോടെ ഒക്ടോബർ മാസത്തിൽ മുംബൈയിൽ താപനില ഉയരുമെന്ന് കാലാവസ്ഥാ നിരീക്ഷണ കേന്ദ്രം. മൺസൂൺ പിൻവാങ്ങുന്നതിന് മുന്നോടിയായുള്ള മഴ വരുംദിവസങ്ങളിൽ നഗരത്തിൽ ലഭിക്കുമെങ്കിലും, അതിനുശേഷം താപനില ക്രമേണ വർധിക്കുമെന്ന് ഐഎംഡി മുംബൈ ഡയറക്ടർ ബിക്രം സിങ് അറിയിച്ചു. ഒക്ടോബർ ആദ്യവാരത്തോടെ മുംബൈയിലെ മൺസൂൺ പിൻവാങ്ങൽ ഔദ്യോഗികമായി പ്രഖ്യാപിച്ചേക്കും.
ഞായറാഴ്ച തെക്കുപടിഞ്ഞാറൻ മൺസൂണിന്റെ പിൻവാങ്ങൽ രേഖ രാജസ്ഥാൻ കടന്നുപോയിട്ടുണ്ട്. വരുംദിവസങ്ങളിൽ മുംബൈയിലും മഹാരാഷ്ട്രയിലും മഴ പ്രതീക്ഷിക്കുന്നുണ്ടെങ്കിലും നഗരത്തിൽ ചൂട് അനുഭവപ്പെട്ടു തുടങ്ങിയിട്ടുണ്ട്. ഞായറാഴ്ച കൊളാബ കാലാവസ്ഥാ കേന്ദ്രത്തിൽ ഉയർന്ന താപനില സാധാരണയേക്കാൾ 2.3 ഡിഗ്രി സെൽഷ്യസ് ഉയർന്ന് 33.2 ഡിഗ്രി സെൽഷ്യസും, കുറഞ്ഞ താപനില സാധാരണയേക്കാൾ 2.1 ഡിഗ്രി സെൽഷ്യസ് ഉയർന്ന് 27.2 ഡിഗ്രി സെൽഷ്യസും രേഖപ്പെടുത്തി. അടുത്ത 48 മണിക്കൂറിൽ ആകാശം ഭാഗികമായി മേഘാവൃതമായിരിക്കുമെന്നും ചിലയിടങ്ങളിൽ നേരിയ മഴയ്ക്കോ ഇടിമിന്നലോടു കൂടിയ മഴയ്ക്കോ സാധ്യതയുണ്ടെന്നും പ്രാദേശിക കാലാവസ്ഥാ പ്രവചനത്തിൽ പറയുന്നു.
ഈ വർഷം വാർഷിക ശരാശരിയുടെ 100.77 ശതമാനം മഴ മുംബൈയിൽ ലഭിച്ചിട്ടുണ്ട്. സെപ്റ്റംബർ 26 വരെയുള്ള കണക്കനുസരിച്ച് ഐലൻഡ് സിറ്റിയിൽ 1908.17 മില്ലീമീറ്ററും, കിഴക്കൻ പ്രാന്തപ്രദേശങ്ങളിൽ 2457.90 മില്ലീമീറ്ററും, പടിഞ്ഞാറൻ പ്രാന്തപ്രദേശങ്ങളിൽ 2306.02 മില്ലീമീറ്ററും മഴ ലഭിച്ചു.
നഗരത്തിന് കുടിവെള്ളം എത്തിക്കുന്ന ഏഴ് ജലാശയങ്ങളിലും ആവശ്യത്തിന് വെള്ളമുണ്ടെങ്കിലും, 10 ശതമാനം ജലനിയന്ത്രണം ബിഎംസി തുടരുകയാണ്. 2027 ഓഗസ്റ്റ് വരെ നഗരത്തിൽ ആവശ്യത്തിന് വെള്ളം ഉറപ്പാക്കേണ്ടതുണ്ടെന്ന് അധികൃതർ വ്യക്തമാക്കി. നിലവിൽ ജലാശയങ്ങളിൽ 97.14 ശതമാനം വെള്ളമുണ്ട് (14.05 ദശലക്ഷം ലിറ്റർ). ഏഴ് തടാകങ്ങളുടെ ആകെയുള്ള സംഭരണശേഷി 14.47 ദശലക്ഷം ലിറ്ററാണ്.
