താനെ : മോഷ്‌ടിക്കപ്പെട്ടതും കാണാതായതുമായ ഏകദേശം 50 മൊബൈൽ ഫോണുകൾ സാങ്കേതിക അന്വേഷണത്തിലൂടെയും സി.ഇ.ഐ.ആർ (CEIR) പോർട്ടലിന്റെ സഹായത്തോടെയും വീണ്ടെടുത്ത് ഉടമകൾക്ക് തിരികെ നൽകി കല്യാൺ ബസാർപേത്ത് പോലീസ്. ലക്ഷക്കണക്കിന് രൂപ വിലമതിക്കുന്ന ഫോണുകളാണ് പോലീസ് ഉടമകൾക്ക് കൈമാറിയത്. ഫോണുകൾ തിരികെ ലഭിക്കുമെന്ന പ്രതീക്ഷയറ്റ് ഇരുന്നവർക്ക് വലിയ ആശ്വാസമാകുന്നതാണ് ഈ നടപടി.
ബസാർപേത്ത് പോലീസ് സ്റ്റേഷനിൽ നടന്ന പ്രത്യേക ചടങ്ങിലാണ് ഫോണുകൾ അർഹരായ ഉടമകൾക്ക് കൈമാറിയത്. കല്യാൺ എ.സി.പി അശോക് ഹോൺമാനെ, ബസാർപേത്ത് പോലീസ് സ്റ്റേഷൻ സീനിയർ പോലീസ് ഇൻസ്പെക്ടർ ഗണേഷ് ന്യായ്ഡെ എന്നിവരുടെ സാന്നിധ്യത്തിലാണ് ചടങ്ങ് സംഘടിപ്പിച്ചത്. നഗരത്തിന് പുറത്തുനിന്നും മറ്റ് പ്രദേശങ്ങളിൽ നിന്നും സാങ്കേതിക അന്വേഷണത്തിലൂടെയാണ് ഈ ഉപകരണങ്ങൾ കണ്ടെത്തിയത്.
ഫോൺ നഷ്ടപ്പെട്ടാൽ ഉടൻ തന്നെ പരാതി നൽകണമെന്ന് ചടങ്ങിൽ സംസാരിച്ച എ.സി.പി അശോക് ഹോൺമാൻ പൊതുജനങ്ങളോട് അഭ്യർത്ഥിച്ചു. മൊബൈൽ ഫോണുകൾ സുരക്ഷിതമായി സൂക്ഷിക്കാൻ ആവശ്യമായ മുൻകരുതലുകൾ എടുക്കണമെന്നും അദ്ദേഹം ഓർമ്മിപ്പിച്ചു. നഷ്ടപ്പെട്ടതോ മോഷ്‌ടിക്കപ്പെട്ടതോ ആയ ഫോണുകൾ കണ്ടെത്താനും തടയാനും സഹായിക്കുന്ന സർക്കാർ സംവിധാനമായ സി.ഇ.ഐ.ആർ പോർട്ടലിന്റെയും സാങ്കേതിക അന്വേഷണത്തിന്റെയും പ്രാധാന്യം വിളിച്ചോതുന്നതാണ് ഈ മാതൃകാപരമായ നടപടി.
