​മുംബൈ : കോൽഹാപൂരിലെ പ്രശസ്തമായ ഗോകുൽ ഡെയറി ബോർഡ് തെരഞ്ഞെടുപ്പിൽ കോൺഗ്രസ് എം.എൽ.സി സതേജ് പാട്ടീലിന്റെ നേതൃത്വത്തിലുള്ള പാനലിന് ഉജ്ജ്വല വിജയം. മൊത്തം 25 സീറ്റുകളിൽ 16 എണ്ണവും നേടിയാണ് സതേജ് പാട്ടീലിന്റെ രാജർഷി ഷാഹു ഷെത്കാരി സംവിചാരി അഘാടി പാനൽ അധികാരമുറപ്പിച്ചത്. മഹായുതി പിന്തുണച്ച പാനലിന് 9 സീറ്റുകൾ മാത്രമാണ് നേടാനായത്.

ഞായറാഴ്ച നടന്ന വോട്ടെടുപ്പിൽ 99.96 ശതമാനത്തോളം പേരാണ് വോട്ട് രേഖപ്പെടുത്തിയത്. തുടർന്ന് തിങ്കളാഴ്ചയായിരുന്നു വോട്ടെണ്ണൽ നടന്നത്. പശ്ചിമ മഹാരാഷ്ട്രയിലെ പ്രമുഖ സഹകരണ സ്ഥാപനമായ ഗോകുൽ ഡെയറിക്ക് വാർഷിക വിറ്റുവരവായി ഏകദേശം 4,000 കോടി രൂപയാണുള്ളത്. തെരഞ്ഞെടുപ്പ് ഫലം സതേജ് പാട്ടീൽ പാനലിന് ബോർഡിൽ വ്യക്തമായ ഭൂരിപക്ഷം നൽകിയിട്ടുണ്ട്.

തെരഞ്ഞെടുപ്പിൽ മന്ത്രി ഹസൻ മുഷ്‌രിഫിന്റെ മകൻ നവീദ് മുഷ്‌രിഫ് 69 വോട്ടുകൾക്ക് പരാജയപ്പെട്ടത് ശ്രദ്ധേയമായി. കൂടാതെ, മുൻ ചെയർമാൻമാരായ അരുൺ ഡോംഗലെ, വിശ്വാസ് പാട്ടീൽ, ശൗമിക മഹാദിക് എന്നിവരും നേരിയ വ്യത്യാസത്തിൽ പരാജയപ്പെട്ട പ്രമുഖരിൽ ഉൾപ്പെടുന്നു.