മുംബൈ: പണിപൂർത്തിയായിട്ടും ഉദ്ഘാടനം വൈകുന്ന മൂന്ന് പുതിയ മേൽപ്പാലങ്ങൾ പൊതുജനങ്ങൾക്കായി തുറന്നുകൊടുക്കാതെ അടച്ചിട്ടിരിക്കുന്നു. വലിയ യാത്രാക്കുരുക്ക് അനുഭവപ്പെടുന്ന നഗരത്തിൽ വിഐപി ഉദ്ഘാടനത്തിന് വേണ്ടിയാണ് പുതിയ പാലങ്ങൾ ബിഎംസി (ബൃഹന്മുംബൈ കോർപ്പറേഷൻ) തടഞ്ഞുവെച്ചിരിക്കുന്നത്.

സയൺ റെയിൽവേ മേൽപ്പാലം, ഗോരേഗാവ്-മുളുന്ദ് ലിങ്ക് റോഡ് ഫ്ലൈഓവർ, വിദ്യാവിഹാർ മേൽപ്പാലം എന്നിവയാണ് ഉദ്ഘാടനത്തിനായി കാത്തുകിടക്കുന്നത്. ഒക്ടോബർ 14-ന് മന്ത്രിമാരെ പങ്കെടുപ്പിച്ച് ഈ മൂന്ന് പാലങ്ങളും ഒന്നിച്ച് ഉദ്ഘാടനം ചെയ്യാനായിരുന്നു പദ്ധതി. എന്നാൽ മന്ത്രിമാരുടെ 
അസൗകര്യം കാരണം ചടങ്ങ് നടക്കാതെ പോവുകയും, പുതിയ തീയതിക്കായി അധികൃതർ ആലോചിക്കുകയും ചെയ്യുകയാണ്.

ജനങ്ങളുടെ യാത്രാദുരിതം പരിഹരിക്കേണ്ട അധികാരികൾ വിഐപി ഉദ്ഘാടനങ്ങൾക്ക് വേണ്ടി മാത്രം പദ്ധതികൾ വൈകിപ്പിക്കുന്നത് കടുത്ത പ്രതിഷേധത്തിന് ഇടയാക്കിയിട്ടുണ്ട്. ഉദ്ഘാടന ചടങ്ങുകൾക്കായി കാത്തുനിൽക്കാതെ പാലങ്ങൾ അടിയന്തരമായി ജനങ്ങൾക്കായി തുറന്നുകൊടുക്കണമെന്ന് സോറു ഭട്ടേനാ ആവശ്യപ്പെട്ടു.