ന്യൂഡൽഹി: കോക്ക്റോച്ച് ജനതാ പാർട്ടി (സി.ജെ.പി) പ്രക്ഷോഭവുമായി ബന്ധപ്പെട്ട് വിദേശ ഇടപെടൽ ഉണ്ടായെന്ന സംശയത്തിൽ സുരക്ഷാ ഏജൻസികളുടെ അന്വേഷണം ശക്തമായി. ഇതിന്റെ ഭാഗമായി നാലായിരത്തിലധികം സാമൂഹിക മാധ്യമ പോസ്റ്റുകളും പ്രൊഫൈലുകളും, വിദേശത്ത് നിന്ന് പ്രവർത്തിക്കുന്ന അഞ്ഞൂറിലധികം അക്കൗണ്ടുകളും സുരക്ഷാ ഏജൻസികൾ പരിശോധിച്ചുവരികയാണ്. പ്രക്ഷോഭത്തിലെ ഫണ്ടിംഗ്, ഡിജിറ്റൽ തെറ്റായ വിവര പ്രചാരണം, ഏകോപനത്തിലെ പാളിച്ചകൾ എന്നിവയെക്കുറിച്ച് ഇന്റലിജൻസ് വിഭാഗം മുന്നറിയിപ്പ് നൽകിയിട്ടുണ്ട്.

പാകിസ്ഥാനുമായി ബന്ധമുള്ള അക്കൗണ്ടുകൾ ഉൾപ്പെടെയുള്ളവയാണ് അന്വേഷണ പരിധിയിലുള്ളത്. കേന്ദ്രീകൃത ബാങ്ക് അക്കൗണ്ടോ ട്രഷറിയോ ഇല്ലാതെ പണപ്പിരിവും ഭൗതിക സംഭാവനകളും നടക്കുന്നതായി ഇന്റലിജൻസ് വിലയിരുത്തുന്നു. സബ്‌സിഡിയറി ഇന്റലിജൻസ് ബ്യൂറോയുടെ (എസ്.ഐ.ബി) യോഗത്തിൽ, സാമൂഹിക അശാന്തി സൃഷ്ടിക്കാൻ സാമൂഹിക വിരുദ്ധ ശക്തികളും ബാഹ്യ ഘടകങ്ങളും ഈ പ്രക്ഷോഭത്തെ ചൂഷണം ചെയ്യാൻ സാധ്യതയുണ്ടെന്ന് വിലയിരുത്തിയിരുന്നു. ഇന്ത്യൻ സൈബർ ക്രൈം കോർഡിനേഷൻ സെന്ററും (ഐ.4സി) മറ്റ് സംസ്ഥാന സൈബർ യൂണിറ്റുകളും സംശയാസ്പദമായ അക്കൗണ്ടുകളുടെ പ്രവർത്തനങ്ങൾ പരിശോധിക്കുന്നുണ്ട്.

വ്യാജ അക്കൗണ്ടുകൾ വഴി തെറ്റിദ്ധരിപ്പിക്കുന്ന വിവരങ്ങളും കൃത്രിമ വീഡിയോകളും പ്രകോപനപരമായ സന്ദേശങ്ങളും പ്രചരിപ്പിക്കുന്നതായും ഏജൻസികൾ കണ്ടെത്തി. ഇതിനിടെ, ഖാലിസ്ഥാൻ അനുകൂല ഭീകരൻ ഗുർപത്വന്ത് സിങ് പന്നൂൻ സി.ജെ.പി പ്രക്ഷോഭത്തിന് പിന്തുണ പ്രഖ്യാപിച്ച് രംഗത്തെത്തിയത് സുരക്ഷാ ഏജൻസികളുടെ ശ്രദ്ധയിൽപ്പെട്ടിട്ടുണ്ട്. തൊഴിലില്ലായ്മയും പരീക്ഷാ ക്രമക്കേടുകളും തിരഞ്ഞെടുപ്പ് പട്ടികയിലെ ക്രമക്കേടുകളും ഉന്നയിച്ച് അഭിജിത് ദിപ്കെയാണ് മെയ് 16-ന് സി.ജെ.പി പ്രസ്ഥാനത്തിന് രൂപം നൽകിയത്. തിരഞ്ഞെടുപ്പ് കമ്മീഷണറുടെ പ്രത്യേക തീവ്ര പുനരവലോകനവുമായി (എസ്.ഐ.ആർ) ബന്ധപ്പെട്ട് മുഖ്യ തിരഞ്ഞെടുപ്പ് കമ്മീഷണർ ജ്യാനേഷ് കുമാറിന്റെ രാജി ആവശ്യപ്പെട്ടും പ്രക്ഷോഭങ്ങൾ നടന്നിരുന്നു.