മുംബൈ: ഈ വർഷത്തെ ദുർഗ്ഗാ പൂജ ആഘോഷങ്ങൾക്കായി മുംബൈയിലെ പ്രമുഖ ദുർഗ്ഗാ പൂജ സമിതികൾ വിപുലമായ തീമുകൾ പ്രഖ്യാപിച്ചു. ബോളിവുഡ് താരങ്ങളായ മുഖർജി കുടുംബം (കജോൾ, റാണി മുഖർജി തുടങ്ങിയവർ) നേതൃത്വം നൽകുന്ന പ്രശസ്തമായ നോർത്ത് ബോംബെ സാർവജനീൻ ദുർഗ്ഗാ പൂജയുടെ പന്തൽ ഇത്തവണ കേരളത്തിലെ പ്രസിദ്ധമായ ഗുരുവായൂർ ക്ഷേത്രത്തിന്റെ മാതൃകയിലാണ് ഒരുക്കുന്നത്.
ജുഹു SNDT കോളേജ് വളപ്പിൽ ഒക്ടോബർ 16 മുതൽ 20 വരെ നടക്കുന്ന പൂജയുടെ 80-ാം വാർഷിക ആഘോഷത്തോടനുബന്ധിച്ചാണ് ഗുരുവായൂർ ക്ഷേത്രത്തിന്റെ തീമിൽ ഭീമൻ പന്തൽ നിർമ്മിക്കുന്നത്. കൊൽക്കത്തയിൽ നിന്നുള്ള വിദഗ്ദ്ധ ശില്പികൾ നിർമ്മിച്ച പരമ്പരാഗത വിഗ്രഹവും തങ്ക അങ്കിയും വിവിഐപി താരസമ്പന്നമായ ഭോഗ് വിതരണവും ഇവിടുത്തെ പ്രധാന ആകർഷണമായിരിക്കും.
നഗരത്തിലെ മറ്റ് സമിതികളും ആകർഷകങ്ങളായ തീമുകളോടെയാണ് ആഘോഷങ്ങൾ സംഘടിപ്പിക്കുന്നത്. ദക്ഷിണ മുംബൈയിലെ ഓഗസ്റ്റ് ക്രാന്തി മൈതാനത്ത് നടക്കാറുള്ള, മുംബൈയിലെ ഏറ്റവും പഴക്കമേറിയ ബോംബെ ദുർഗ്ഗ ബാരി സമിതി (96-ാം വർഷം) ‘കുംഭമേളയും ആത്മീയതയും’ എന്ന പ്രമേയത്തെ അടിസ്ഥാനമാക്കിയാണ് പന്തൽ ഒരുക്കുന്നത്.
ദാദറിലെ ബംഗാൾ ക്ലബ് 19 അടി ഉയരമുള്ള പരിസ്ഥിതി സൗഹൃദ വിഗ്രഹവും പശ്ചിമ മേദിനിപ്പൂരിലെ പരമ്പരാഗത പിങ്ള കലാരൂപങ്ങൾ പ്രമേയമാക്കി ചെമ്പൂർ ദുർഗ്ഗാ പൂജ അസോസിയേഷനും ആഘോഷങ്ങൾ സംഘടിപ്പിക്കുന്നു. ഓക്ടോബർ 25-ലെ ലക്ഷ്മി പൂജയ്ക്കും നവംബർ 8-ലെ കാളി പൂജയ്ക്കും ശേഷമേ മുംബൈയിലെ ഈ വർഷത്തെ നീണ്ട ഉത്സവകാലത്തിന് സമാപനമാകൂ.
